Jeta është kthyer në normalitet pas heqjes së barrikadave në disa lokacione në veri të Kosovës.
Kamioni i fundit që ishte parkuar matanë barrikadës në rrugën në fshatin Rudare, afër Zveçanit, në veri të Kosovës, është hequr të enjten rreth orës 17:00.
Barrikada në Rudare ishte ndër më të mëdhatë e ngritura në rrugët në veri të Kosovës dhe që nga 10 dhjetori kishte bllokuar rrugën kryesore Mitrovicë – Leposaviq me 14 kamionë, cisterna dhe autobusë. Gjatë ditëve të fundit, dhjetëra serbë vendas, si dhe persona të maskuar, e ruanin atë barrikadë ditë e natë me turne.
Policia e Kosovës të enjten ka njoftuar se barrikada që ndodhej në dy kilometra nga pikën kufitare të Merdares ndërmjet Kosovës dhe Serbisë, në anën serbe, është hequr dhe se pas dy ditësh është rihapur për qarkullim.
Heqja e barrikadave në Kosovë filloi pas thirrjes së presidentit të Serbisë, Aleksandar Vuçiç, e cila pasoi takimin me serbët nga Kosova, të mbajtur në Rashkë.
Serbët vendas bllokuan rrugët në Kosovë me makineri të rëndë për më shumë se dy javë, për shkak të arrestimit të Dejan Pantiçit, ish-pjesëtar i Policisë së Kosovës, i dyshuar për sulmin ndaj zyrtarëve të Komisionit Qendror të Zgjedhjeve të Kosovës.
Disa ditë më vonë, Sllagjan Trajkoviç, një tjetër ish-pjesëtar i Policisë së Kosovës, u arrestua dhe u akuzua për akte terroriste. Të dyve iu është caktuar masa e paraburgimit prej 30 ditësh.
Sipas vendimit të ri të gjykatës në Prishtinë, Pantiçit të enjten i është caktuar masa e arrestit shtëpiak. /tesheshi.com/
