Propozimi i kandidatit republikan, Donald Trump për të ndaluar muslimanët të hyjnë në Shtetet e Bashkuara është cilësuar nga presidenti Barack Obama se “nuk është ajo që Amerika dëshiron. Presidenti Obama, deri më tani i papërfshirë drejtpërdrejt në garën presidenciale, duket se ka hequr dorezat në një përballje me manjatin njujorkez, tashmë kandidat pothuajse zyrtar i republikanëve për Shtëpinë e Bardhë.
Trajtimi i ndryshëm i muslimanëve amerikane vetëm sa do ta bëjë vendin më të pasigurtë duke rritur ndarjen midis Perëndimit dhe botës muslimane, tha presidenti.
Më herët, ishte Trump që e zgjeroi planin e tij, duke thënë se duhej të ndaloheshin njerëzit nga të gjitha vendet që kanë histori terrorizmi kundër Shteteve të Bashkuara. Komentet e tij erdhën pas masakrës në Orlando, e cila sipas tij justifikonte ndërmarrjen e një veprimi të tillë. Masakra ka për autor një shtetas amerikan, prindërit e të cilit janë afganë.
Sipas Trump, propozimi i tij do të mund të zbatohej përmes veprimit ekzekutiv të njëanshëm, duke pasur parasysh pushtetin e presidentit “për të pezulluar hyrjen në vend të çdo klase personash që presidenti konsideron se mund të jenë të rrezikshëm për interesat apo sigurinë e Shteteve të Bashkuara”.
E gjithë kjo retorikë duket se ka future në lojë, presidentin Obama i cili është përgjigjur tërë zemërim, duke ndërmarrë sulmin më të fuqishëm ndaj personit që pritet të konfirmohet muajin e ardhshëm si kandidati republikan në garën për Shtëpinë e Bardhë.
Analistët thonë se presidenti Obama është kritikuar shpesh se emocionalisht ka qenë i ftohtë, se ka qenë shumë i qetë dhe i paqëllimtë. Por, këtë radhë, pasi mbajti fjalën në këshillin e sigurisë kombëtare, ai u duk i furishëm ndërsa deklaroi qëndrimine tij ndaj Donald Trump dhe kërkesës së tij për të ndaluar muslimanët të hyjnë në Amerikë.
Përgjithësisht, Obama e ka shmangur përmendjen e Donald Trump, por kërkesa e miliarderit pas masakrës së Orlandos se Obama duhet të japë dorëheqjen për shkak se ka refuzuar të përdorë termin “Islami radikal” qartësisht e ka egërsuar presidentin. Akuza me fjalë të ashpra e Trump vinte në dyshim patriotizmin e presidentit. Ndërsa gëzoi shumë mbështetës të tij që e shohin Obamën si një kryekomandant të dobët që nuk ka bërë pothuajse asgjë për të luftuar të ashtuquajturin ISIS, deklaratat e Trump mund të bëjnë që shumë republikanë të moderuar të ngrenë pikëpyetje mbi tenmperamentin dhe gjykimin e tij.
Në Amerikën e ditëve të sotme, ngjarje traumatike si masakra e Orlandos tentojnë të ekspozojnë ndasitë e vendit po aq shumë sa edhe t’i bashkojnë palët. E kjo është e vërtetë sidomos në këtë sezon të nxehtë elektoral.
Presidenti Obama tha se Shtetet e Bashkuara janë themeluar mbi lirinë e besimit dhe se kryerja e një “testimi fetar” do të binte ndesh me Kushtetutën. Ai gjithashtu vuri në dukje se sulmet e fundit terroriste në tokën amerikane janë kryer nga njerëz të lindur në Amerikë.
Presidenti gjithashtu, apeloi që Shtetet e Bashkuara të rivendosin ndalimin e armëve agressive. Ai hodhi poshtë sugjerimin e Trump se duhet të japë dorëheqjen për shkak se refuzoi të përdorë termin e Islamit radikal.
“Nëse biem në grackën e pikturimit të të gjithë muslimanëve me të njëjtën furçë dhe nëse themi se jemi në luftë me një besim të tërë, atëherë ne jemi duke bërë punën e terroristëve”, tha ai.
Përgatiti: Juli Prifti – /tesheshi.com/
