Megjithëse çadra opozita është në prag të mbylljes, e Rama e Meta po i rikthehen njëri-tjerit si aleatë strategjikë, aleancat parlamentare janë sot vetëm njëçështje numrash. Cilat janë 71 votat që mbajnë qeverinë në këmbë, loja politike e Metës dhe e Llallës me mandatet, që do mund të çonin tek një qeveri teknike? Pse Ruçi ka urdhëruar deputetët të mos mungojnë në seancë?!
Deputetët e Partisë Socialiste prej disa javësh kanë marrë urdhër partiak që të mos planifikojnë asnjë udhëtim jashtë vendit të enjteve që ka seancë parlamentare. Arsyeja është e thjeshtë; pasiguria që ka PS-ja tek aleatja e saj kryesore LSI e bën që të ruajë balancën e votave në Kuvend me deputetët e aleates tjetër, PDIU.
Votat i duhen për të kaluar ligjet në Kuvend, por burime nga mazhoranca thonë se kjo bëhet për të parashikuar çdo skenar të mundshëm deri tek një mocion kundër qeverisë. Një mocion votbesimi ndaj qeverisë i cili mund të merrte më shumë se 70 vota do të rrëzonte këtë qeveri dhe do të lindte nevojën për një qeveri të re, teknike deri në zgjedhje.
Por sa i mundur është ky skenar?!
Nëse LSI vendos të dalë nesër nga koalicioni qeverisës skenari është plotësisht i mundur. PS ka humbur të paktën 3 deputetë nga radhët e saj, Ben Blushin e Mimoza Havizin dhe Armando Prengën i cili dorëzoi mandatin dhe pritet që mandati i tij ti kalojë një emri nga lista e LSI-së. Megjithëse KQZ po e mban zvarrë çështjen e zëvendësimit të tij të gjitha gjasat janë që ai të pasohet nga një emër i Metës duke i shtuar atij 1 mandat. PS kishte 66 deputetë pas zgjedhjeve të 2013-ës, njëri ishte Spartak Braho i LSI-së, prai mbeten 65, pas ikjes së Blushit, Havizit dhe tani të Prengës ky numër zbret në 62, plus 8 deputetë të PDIU-së numri shkon në 70. Pra nuk e bën një shumicë të thjeshtë deputetësh, por në një rast votimi për të rrëzuar qeverinë mund t’i shtohen vota të tjera si; Mhill Fufi i cili është përjashtuar nga grupi i PD-së dhe nuk dihet nëse Blushi e Havizi do t’i bashkoheshin PD-së. Retorika e tyre është kundër qeverisë dhe Ramës por nuk pranuan t’i bashkoheshin protestës së PD-së.
Vetë LSI ka në radhët e saj deputetë që mund të votojën qeverinë pavarësisht vendimit të partisë.
Loja me mandatet nga prokuroria
Në lojën e numrave në Kuvend është futur dhe Prokuroria me kryeprokurorin Adriatik Llalla i cili është zgjedhur nga PD dhe LSI. Aktualisht prokuroria ka nën hetim deputetët Ymer Mamo e Aqif Rakipi nga PDIU, Mhill Fufin, Artan Gaçin dhe Gledion Rehovicën (ish-deputet i LSI-së, tani me PDIU-në), të gjitha vota potenciale pro qeverisë. Heqja e mandateve të tyre do të ndryshonte sërish balancat në Kuvend.
Këto kalkulime duhet t’i ketë bërë mirë Rama dhe Meta kur flasin për 71-votat.
Vetëm pak kohë më parë Rama u tha deputetëve socialistë se koalicioni PS-PDIU i ka 71 vota pa LSI.
Meta iu përgjigj dhëmbë më dhëmbë se “LSI nuk është shtojcë e askujt, nëse PD do kishte 71 mandate LSI nuk do kishte hyrë në koalicion, nëse sot Rama konfirmon 71 mandate në mënyrë legjitime apo jo, LSI del në opozitë që tani”.
Zërat brenda koalicionit e shohin të mundur ndarjen e aleancës para fundit të prillit, ndërsa protesta e opozitës në Bulevard po pret një përgjigje nga LSI-ja për të arritur kërkesën bazë; qeverinë teknike pa Edi Ramën.
Se çfarë po gatuhet në zyrën e Metës e Ramës mbetet për t’u parë në vijim, e sigurt është se muaji mars, kur është dhe zgjedhja e presidentit, do të jetë vendimtar. /tesheshi.com/
