Analistë shqiptarë pritet të grupohen politikisht, duke vendosur të kalojnë nga fjala te veprimi, nga komentet te aksioni konkret, nga kritikat te ofertat, nga studiot te sheshet, në një përpjekje për të shpëtuar demokracinë nga kriza e pluralitetit pas vetëdaljes të opozitës PD-LSI nga sistemi, e sfiduar Edi Ramën.
“Ne, njerëz të medias, të shqetësuar nga ajo që po ndodh e mund të ndodhë më tej me fatin e demokracisë shqiptare, ku siç po shihet, me 30 qershor qeveria po shkon në zgjedhje pa opozitën që dogji mandatet, vendosëm që të shndërrohemi në faktorë politikë, në një mision historik për t’a frenuar rënien e vendit në monizëm.
Me përgjegjësinë që na jep e ardhmja e vendit, në këto kohë delikate, ne e konsiderojmë të pavend që të jemi thjesht llogarikërkues e aspak ofertues. Eshtë koha që fjala t’i lërë vend veprimit, aksionit politik. Jo vetëm për të shpëtuar pluralitetin, por dhe për sfiduar Edi Ramën, keqqeverisjen e tij.
Ne duam të provohemi, që ashtu siç mendojmë se jemi të aftë në kritika e akuza, mundet të jemi të tillë dhe në marrje përgjegjësish.
Në këtë kontekst, ftojmë dhe Lubonjën që paçka përbetimit dikur se do qëndronte larg politikës e vetëm në përballje me politikën si zë intelektual, që sot të ndryshojë profil. Eshtë koha që dhe ai, ashtu si dhe ne ta tregojë se mundet t’i shërbejë Shqipërisë ndryshe, më saktë si një ofertë politike, për të bindur si veten e si opinionin, se është ku e ku më lart se ish-vëllai i tij shpirtëror e intelektual, Edi Rama.
Ne duhet t’i tregojmë gjithashtu këtij të fundit, se nuk mundet të vijojë të na sfidojë nëpër studio nga pozitat e një aftësie ligjërimore, ndërkohë që ka përgjegjësi politike; edhe ne do marrin prej sot përgjegjësi politike dhe do e mundim me votë. Më pas do e sfidojmë në planin qeverisës, duke i treguar se sa i paaftë dhe i korruptuar që ishte. Jo thjesht duke hetuar por duke shkëlqyer me modelin tonë, vizionar e moral njëherësh.
Kjo që duam të bëjmë, pra kalimi nga kritika te oferta, nga fjala te veprimi, nuk është hiç e pamundur. Na e mundëson këtë vetë modeli Rama, i cili dikur qe si ne e më pas kaloi në politikë, deri sa sot qeveris vendin.
Në këtë pikë, ai ka një meritë pasi na ka treguar rrugën se si duhet vepruar në arritjen e asaj pike që mos të të mbetet vetëm fjala pa e poseduar veprimin, por që të vijë ai moment t’i posedosh që të dyja, kur mendon e beson se ti mund t’i bësh më mirë gjërat. Kësaj i ndih dhe vetë sistemi demokratik ku ndodhemi. Ai i ka të gjitha hapësirat dhe mekanizmat për ta mundësuar konkurrencën, e pse jo dhe triumfin politik. Shembuj të tilla bota demokratike ofron me okë. Rasti më i fundit është Ukraina, që ia besoi drejtimin një komediani. Dhe komediani i morri atë me votë, pasi u bë nga faktor skenik në faktor politik.
Vërtet pluralizmi është në krizë, por jo demokracia si hapësirë e ushtrimit politikisht të pluralitetit. Në këtë pikë, falë demokracisë, Rama nuk na pengon dot t’i dalim përballë e ta sfidojmë.
Njëherësh, ky është shansi, është momenti, që ashtu siç bëjmë thirrje për ardhjen e një klase të re politike, të jemi pikërisht ne ajo klasa politike e re që do ndryshojë fatin shqiptar në tranzicion.
Në këtë pikë, ne duam të sjellin dhe një risi, një model unik, për të qenë referencë më pas dhe për vende të tjera, se si nja kastë gazetarësh influentë në mendimin publik, të cilët jetojnë me meraqe të përbashkëta për shoqërinë dhe të ardhmen e Shqipërisë, të mund të faktorizohen politikisht e të jenë një histori suksesi. Dhe ne duam të jemi të tillë.
Ndaj prej sot, ne i drejtohemi popullit duke kërkar prej tij besimin me votë, me misionin për të ndryshuar fatin e tij, që për fatin e keq po ka të njëjtin fat në më pak se 30 vite tranzicion, edhe së fundi nën Edi Ramën”.
Ekipi nismëtar
Post-scriptum: Ky zhvillim hipotetik ofruar i tillë dhe si lajm, vjen pas Real Story-t të një natë me parë, ku dy emra më status analisti, njëri vërtet i tillë sa i përket përgatitjes në terma politikë – Arjan Vasjari, e tjetri komentator i sforcuar politik ardhur nga kritika letrare – Agron Gjekmarkaj, të ndodhur përballë Edi Ramës shfaqën ankthin se vendi po rikthehet në monizëm, siç besojnë se do ndodhë pas zgjedhjeve të 30 qershorit.
Si ata janë dhe dhjetra të tjerë që shfaqin të njëjtin regjistër ankthi e shqetësimi Shqipëridashës mbi të ardhmen politike të vendit. Ata nuk ofrojnë receta se si zgjidhet situata, por i kërkojnë llogari Ramës – edhe pse një pjesë, siç Vasjari, i japin plotësisht të drejtë në pozitën ku ndodhet përballë aksionit ekstrem opozitar, veç atyre që shkurt kërkojnë që Rama të dorëhiqet, pasi thjesht ashtu duan, pa iu referuar asnjë shkolle apo precedenti politik botëror. Veç kësaj, askush prej tyre nuk merr mundimin që të hidhet vetë në aksion politik për ta shpëtuar pluralizmin “në zhdukje”.
Mund ta bëjnë këtë emra si: Artur Zheji, dy Andët, Bushati e Bejtja, Armand Shkullaku, Fatos Lubonja, Ylli Rakipi, Artan Hoxha (ish-kandidati për president), Sonila Meço, Agron Gjekmarkaj, Alfred Lela, Dritan Hila, Arian Vajsari, Preç Zogaj, Mentor Kikia, Robert Rakipllari etj.etj., pse jo dhe Blendi Fevziu apo Adi Krasta, të cilët vërtet do ia shtonin kuotat prestigjit të aksionit politik të tyre.
Është koha e tyre, nëse nuk e kanë kuptuar. Por vetëm politikisht! /tesheshi.com/
