Himara, e njohur deri më sot për ndonjë incident të natyrës etnike, regjistroi të parën ngjarje të rëndë rendi me një atentat klasik një personi, ndodhur kjo në ambient publik.
Niko Goro, 51 vjeç, biznesmen i njohur në zonë, i afërt gjaku me kryebashkiakun Gjergji Goro, u ekzekutua me kallashnikov pasi doli nga një supermarket në pronësi të së motrës. Thuhet se ndaj tij qëlloi një person, i cili zbriti nga një furgon ku qëndronin dhe tre persona të tjerë.
Nga të shtënat u plagos dhe një grua që shoqërohej me viktimën, ende e padetajuar se cila ka qenë.
Njoftimi zyrtar i policisë thotë se “më datë 17.10.2020, rreth orës 08.55 minuta, në vendin e quajtur rrethrrotullimi që të çon në lagjen Spille Himarë, nga një person ende i paidentifikuar është vrarë me armë zjarri shtetasi N.G, 51 vjeç.
Si pasojë është plagosur lehtë në këmbë edhe shtetasja E. Q., 57 vjeçe, jashtë rrezikut për jetën.
Shërbimet e Policisë kanë shkuar menjëherë në vendngjarje, janë ngritur pika kontrolli në aksin rrugor Himarë – Borsh e Himarë – Vlorë.
Në ndihmë të Policisë Vendore janë nisur forcat Operacionale dhe Shqiponjat e DVP Vlorë. Në vendngjarje ka shkuar grupi hetimor dhe nën drejtimin e Prokurorisë po vijon puna për zbardhjen e rrethanave të ngjarjes, identifikimin dhe kapjen e autorëve”.
Dyshimet e para për motivin e ekzekutimit, ishin ato për çështje pronash, por më vonë u zbardh gjithçka, autori dhe motivi.
Njeriu që i morri jetën biznesmenit raportohet të jetë Kliti Leka, 53 vjeç, me profesion elektricist. Ky i fundit ka pretenduar se biznesmeni i kishte mbetur borxh 70 mijë euro, pasi i kishte dhënë një tokë për ndërtim e s’ishte paguar.
“I kam dhënë tokën nuk më ka dhënë lekët. Po ndërton në tokën time”, i ka thënë ai policisë. /tesheshi.com/
