Do jetë një grua me emër shqiptar e mbiemëër verior që do drejtojë Himarën deri në pasjen e një kryetari të ri Bashkie, me gjasë, vendosur me votim të pjesshëm.
Blerina Bala, n/kryetare e kësaj Bashkie, do jetë ajo që do pasojë Jorgo Goron prej ditësh në qeli, nën akuzë nga SPAK. Emërimi i saj u bë në një atmosferë të rënduar reagimesh të ashpra nga ithtarë të Belerit, të cilët, për më tepër arritën dhe të pështyjnë prefektin e ri Vangjel Tavo, minoritatin e njohur nga Gjirokastra. Bala u komandua si kryetare e përkohshme në një mbledhje të Këshillit Bashkiak të Himarës, duke u votuar pro më shumicë.
Tavo, i cënuar rëndë në dinjitetin e tij njerëzor, u shpreh:
“E dimë që kjo është stuhi në gotë dhe kjo nuk mund të zgjasë pafundk por dua të them se na presim punë të mëdha në Himarë, duke filluar me zgjidhjen e problemeve kryesore që ky komunitet të tre njësive ka në lidhje me vonesat që janë krijuar për arsye nga më të ndryshmet me hipotekimin e pronave të tyre dhe këtu unë si prefekt në bashkëpunim me pushtetin vendor dhe kryetaren e sapocaktuar dhe me agjencitë shtetërore të Kadastrës do të fillojmë që nga e marta që të përfundojmë të gjithë procesin”.
Reagoi gjthashtu dhe kryeministri Rama, duke thënë se “zgjedhja e sotme nga Këshilli Bashkiak të Himarës, me 15 vota pro dhe vetëm 4 kundër, e nënkryetares së bashkisë, Blerina Bala, si kryetare në detyrë është një zhvillim pozitiv për vazhdimin e punës së qeverisë vendore.
Përpjekja e dështuar e një grushti individësh të nxitur për ta penguar këtë zhvillim të bazuar në detyrimin përkatës ligjor të Këshillit Bashkiak, tregoi qartë faktin e thjeshtë se shumica e madhe e himariotëve nuk i përkasin llogores së konfliktit, përçarjes dhe amplifikimit absurd të një sherri primitiv, i cili ushqehet për interesa dhe hesape që s’kanë asnjë lidhje me interesat dhe nevojat legjitime të popullit të Himarës”.
Ndërsa vetë e zgjedhura, Blerina Bala, tha:
“Më lejoni të bëj një falenderim të veçantë për besimin që më është dhënë sot. Në muajt në vijim fokusi i bashkisë Himarë do te jetë i përqëndruar në punë me qëllim përmbushjen e objektivave dhe synimeve, sidomos referuar sezonit turistik. Jam e ndërgjegjshme që asnjë punë nuk bëhet vetëm, ndaj mendoj se pas 10 muajsh të vështirë, Himara meriton që midis aktorësh vertikal dhe horizontal, të ketë bashkëpunim sa më të ngushtë e mbështetje sa më të madhe. Ju faleminderit”. /tesheshi.com/
