Kreu i diplomacisë greke, Nikos Kotzias nuk ka qenë në të njëjtën gjatësi vale me Dulen dhe Neranxin, dy zërat më reagues të një ditë më parë në Himare, teksa nisi aksioni për prishjen e disa ndërtimeve për t’i hapur rrugë rivitalizimit urban të qendrës së qytezës më të madhe të Bregut. Por kësaj here, Athina ka qenë me ligjin dhe nuk e ka parë aksionin si me prapavijë etnike, siç e cilësoi Dule e bashkë me të dhe Neranxi, në komentet e tyre të ashpra.
Kotzias ka thënë se reagim ka patur vetëm për rastet e prishjes së godinave të ligjshme, për të cilat ka marrë premtimin e qeverisë shqiptare se do të kompensohen totalisht. Por shefi i diplomacisë së Athinës nuk u ka dalë për zot atyre godinave të cilat kanë qenë në paligjshmëri e nuk iu është vërtetuar pronësia. Mbi të gjitha, zyrtari i lartë grek, ka thënë se nuk mund të pengohet assesi planin për rijetëzimin urban të Himarës.
Ky reagim i pazakontë i Athinës zyrtare, që deri më sot është treguar tejet e ashpër me qeverinë e Tiranës për çdo gjë që ndodh në Himarë, komentohet si produkt i negociatave të fundit mes dy ministrave të jashtëm, për t’i dhënë udhë zgjidhjes së çështjeve të mbetura pezull mes dy vendeve. /tesheshi.com/
