Me nderime të larta shtetërore i është dhënë lamtumira Hilmi Haradinajt, babait të kryeministrit të Kosovës.
Ai është varrosur në varrezat e Kompleksit Memorial “Dëshmorët e Kombit” në Gllogjan, vendlindjen e tij.
Kryeministri Hardinaj mori fjalën pak para varrimit, ku foli për veprimtarinë e babait të tij dhe ndjenjat e tij për ikjen e të atit nga kjo botë.
“Ndarja nga babai ynë, Hilmiu, ka shumë porosi dhe ndjenja. Ajo që është me rëndësi është se ata që besojnë në të drejtën e tyre, krijojnë edhe vlerë të re. Dhe babai ynë në një kohë jo shumë të lehtë arriti të krijojë njerëz që e duan dhe e mbrojnë lirinë”, u shpreh Haradinaj.
Ai më tej tha se liria e Kosovës ka ardhur edhe falë kontributit të babait të tij.
“Liria e Kosovës ka ardhur me shumë mund, dhe është si rezultat i shumë mundimeve dhe si rezultat i ndihmës së miqve tanë. Porosia është t’i mbetemi besnikë, ashtu si ishte besnik për lirinë babai ynë. U prefsh në paqe plak”, tha Haradinaj.
Po ashtu, edhe djali tjetër, deputeti Daut Haradinaj, ka shkruar fjalë prekëse në profilin e tij në Facebook pas varrimit të babait, Hilmiut.
”Plak, ashtu siç e deshe popullin dhe vendin tënd, me pietet po të përcjellin Ty sot, me nderime shtetërore e kombëtare, për tek djemtë, bashkudhëtarët dhe shokët tu. Rruga e mundimshme dhe me shumë sakrifica, sado të mëdha, kur bëhet për vend, është vlerë të cilën sot po ta çmon me plot respekt populli Yt Hilmi Haradinaj. Pusho në qetësi plak, se e di se nuk e ke pas lehtë me ne!”, shkruan Haradinaj.
Kujtojmë se Hilmi Haradinaj është varrosur me nderime të larta shtetërore në varrezat e Kompleksit Memorial “Dëshmorët e Kombit” në Gllogjan.
Në varrim morën pjesë shumë qytetarë dhe politikanë nga vende të ndryshme.
Kujtojmë se Hilmi Haradinaj vdiq para dy netësh pas një sëmundjeje të rëndë. /tesheshi.com/
