Në orën 21.30 minuta me orën e Shqipërisë, Hillary Clinton ka shpallur botërisht se do të konkurojë për Presidente e Shteteve të Bashkuara të Amerikës, në fillim brenda Partisë Demokrate e më pas në zgjedhjet e përgjithshme në vitin e ardhshëm.
Në një postim në twitter, zonja Clinton deklaroi: “Do të konkuroj për President. Çdo ditë amerikanët kanë nevojë për një kampion dhe unë dua të jem ai kampion”. Dhe më pas shton: “Po përgatitem të bëj diçka Do të garoj për t`u bërë Presidente. Mendimi im i parë është për familjet amerikane. Kur familjet janë të forta, Amerika është e fortë,” tha Hillary në një video prej 90 sekondash të cilën po e paraqesim pak më poshtë,
Hillary Clinton, një emër mjaft popullor për të gjithë shqiptarët, jo vetëm se ka vizituar zyrtarisht Tiranën kur ka qenë Sekretare e Shtetit në kuadrin e 100 vjetorit të Pavarësisë, ku dha një mesazh mjaft të rëndësishëm, por se gjatë kohës kur ishte Zonja e Parë e SHBA, bashkëshorte e Presidentit Bill Clinton, SHBA çliroi Kosovën nga pushtimi një shekullor serb dhe ndërhyri në firmosjen e Marrëveshjes së Ohrit në Maqedoni.
Por ka një tjetër të re në fushatën për Presidente të zonjës Clinton. Kreu i fushatës së saj zgjedhore është një emër shumë i njohur për politikën shqiptare. Ai është John Podesta, vëllai i Tony, kreut të kompanisë së famshme Podesta Group, e cila u përfshi në polemika të forta dy vjet më parë se ka lobuar për Partinë Demokratike ndërkohë që është paguar me paratë e buxhetit të shtetit. Lobimi i Postestas është bërë edhe në kohën kur KQZ preku zgjedhjet bashkiake të Tiranës, të njohura si të parregullta nga i gjithë komuniteti ndërkombëtar. “Po ju sjell një mesazh në twitter nga @HillaryClinton e cila shpall kandidaturën për President. Jam krenar të jem kreu i fushatës “Hillary për Amerikën, #Hillary2016”, thekson Podesta në një mesazh në twitter dhe në një email drejtuar gjithë financuesve të fushatës së zonjës Clinton. Ajo është favoritja e shumë grupeve të grave, të rinjve dhe për momentin pretendentja më e fortë e kampit demokrat.
Shtatë vjet më parë, ajo e filloi garën si kandidatja favorite, dhe këtë radhë ndoshta edhe më shumë. Në pjesën më të madhe të anketimeve, Hillary Clinton është 50 pikë përpara kandidatit demokrat më të afërt.
Ish-aspirantja për presidente e vitit 2008, rikthehet në garë pas disa dekadash në jetë publike, si zonjë e parë, si senatore e Shteteve të Bashkuara, dhe si sekretare shteti me Presidentin Obama.
Me emrin e saj të mirënjohur në politikë, Hillary Clinton është konsideruar prej kohësh si kandidatja kryesore e demokratëve për vitin 2016, duke patur kështu një numër të kufizuar sfidantësh politikë.
Analisti politik Charlie Cook, i “Charlie Cook Political Report”, thotë se sfida më e madhe për fushatën e znj. Clinton mund të jetë e shkuara e saj.
“Mendoj se në njëfarë mënyre, Hillary Clinton do të garojë me vetveten. Asaj i duhet të tregohet e përshtatshme për shekullin e 21-të. i duhet të jetë e orientuar më shumë drejt së ardhmes sesa të shkuarës. Po ta mendosh, ajo ka pjesën e saj në 16 nga 24 vjet në Shtëpinë e Bardhë, në një kohë kur njerëzit po kërkojnë një ndryshim”.
Ndërkohë që znj. Clinton po përballet me rivalitet të kufizuar për të marrë emërimin demokrat, një vazhdë e gjatë me kandidatë janë duke luftuar për emërimin republikan.
Znj. Clinton pritet të pasojë njoftimin në mediat sociale me takime me votuesit në shtetet ku do të zhvillohet raundi i parë i zgjedhjeve partiake. Raundi i parë i votimeve paraprake për zgjedhjen e kandidatit demokrat për president do të zhvillohet në shkurt 2016.
/tesheshi.com/
Linku i Videos
