Kandidatja demokrate në garën presidenciale në SHBA ka folur dje për vrasjen masive në klubin e natës në Florida, duke e vënë theksin te shmangia e demonizimit të një feje të tërë.
Pesëdhjetë persona, duke përfshirë dhe kryerësin e masakrës, djalin e një familjeje emigrantësh afganë por të lindur në SHBA, vdiqën në një prej vrasjeve më të përgjakshme në vend.
Ish-sekretarja amerikane e Shtetit ka kërkuar gjetjen e një mënyre për t’i mbajtur të sigurta Shtetet e Bashkuara të Amerikës, por pa i demonizuar amerikanët muslimanë.
“Ne nuk mund ta demonizojmë, të bëjmë demagogji, dhe të deklarojmë luftë ndaj një feje të tërë. Kjo është thjesht e rrezikshme,” ka deklaruar ajo.
Reagimi i Clinton-it ka ardhur pas deklarimeve në të njëjtën linjë të ashpër të kandidatit republikan, Donald Trump, që e përsëriti thirrjen e tij për një ndalim të hyrjes së muslimanëve në SHBA, duke kërkuar gjithashtu mbikëqyrje të xhamive.
Clinton është shprehur në një sërë intervistash se është në mbështetje të masave më të fuqishme për t’i parandaluar sulmet e “ujqërve të vetmuar”, por, në të njëjtën kohë, ka deklarur angazhimin për mbrojtjen e të drejtave të muslimanëve amerikanë.
Ajo ka bërë thirrje për urtësi politike pas asaj që ndodhi në Orlando, e për shmangie të qëndrimeve partizane.
Presidenti Obama do të thoshte gjithashtu të hënën se nuk kishte asnjë provë të qartë që Omar Mateen, personi i dyshuar për vrasjen masive në klubin e natës, ishte pjesë e një komploti terrorist, apo se ai ishte drejtuar nga një grup terrorist. /tesheshi.com/
