Senatori i Vermontit është shfaqur më në fund përkrah Hillary Clinton-it, duke i dhënë mbështetje të plotë asaj në fushatën për zgjedhjet presidenciale në SHBA.
“Ajo do të jetë kandidatja demokrate për presidente, dhe unë kërkoj të bëj gjithçka që mundem për të garantuar që ajo ka për të qenë presidentja e ardhshme e Shteteve të Bashkuara,” deklaroi ish-rivali i sekretares amerikane të Shtetit në një aktivitet fushate në Nju Hempshir.
Bernie Sanders nuk kishte pranuar më herët të hiqte dorë nga përpjekja e tij, edhe pse qe bërë e qartë se nuk mund të fitonte ndaj Clinton-it.
Edhe pse ai do ta mposhtte Hillary Clinton-in në zgjedhjet paraprake në Nju Hempshir në shkurt të këtij viti, vendosi këtë herë që të shfaqej krah saj në betejën për të dalë fitues karshi Donald Trump-it në zgjedhjet presidenciale.
“Nuk është sekret që unë dhe Hillary Clinton nuk pajtohemi mbi një sërë çështjesh…. Por jam i lumtur t’ju them se kishte një bashkim domethënës të dy fushatave, dhe ne prodhuam platformën më progresive në historinë e Partisë Demokratike,” u shpreh i entuziazmuar senatori.
Mbështetja e Sanders-it për Clinton-in vjen më pak se dy javë para hapjes së konventës kombëtare të demokratëve në Filadelfia, ku pritet zyrtarizimi i Hillary Clinton-it si kandidate në zgjedhjet presidenciale të 8 nëntorit. /tesheshi.com/
