Kandidatja e demokratëve amerikanë në zgjedhjet e fundit presidenciale i është kthyer edhe një herë temës së humbjes së saj në to.
E intervistuar nga Christiane Amanpour e CNN-it në një aktivitet në Nju-Jork, Hillary Clinton do të deklaronte se merrte tërë përgjegjësinë për humbjen e disa muajve më parë, por duke bërë me faj dhe ndërhyrjen ruse, vendimet e FBI-së, si dhe mizogjininë.
“Isha në rrugën drejt fitores gjersa një kombinim i letrës së Jim Comey-t [shefit të FBI-së] më 28 tetor dhe Wikileaks-it rus krijoi dyshime në mendjet e njerëzve të prirur për të votuar për mua.”
Clinton ka shprehur bindjen se të mos kishin qenë këto, ajo sot do të ishte në Shtëpinë e Bardhë.
“Unë do të isha presidente sikur zgjedhjet të kishin qenë më 27 tetor.”
Sa për ndërhyrjen ruse, ish-sekretarja amerikane e Shtetit nuk kishte asnjë lëkundje në bindjen për të.
“Ai [presidenti Putin] ndërhyri sigurisht në zgjedhjet tona. Dhe është e qartë se ndërhyri për të më dëmtuar mua dhe për të ndihmuar kundërshtarin tim.”
Me dështimin në zgjedhjet e fundit presidenciale, të pakta janë pritshmëritë që Hillary Clinton t’i rikthehet sërish kandidimit. /tesheshi.com/
