Ish-sekretarja amerikane e Shtetit, që nuk ia doli të bëhej presidente e SHBA-së në zgjedhjet e fundit, ka bërë daljen e parë publike që pas mbarimit të garës presidenciale.
E ftuar në një aktivitet në Uashington, ajo ka treguar për ditët e vështira që ka kaluar pas humbjes në zgjedhje karshi Donald Trump-it.
“Tani do ta pranoj se ardhja këtu sonte nuk ishte gjëja më e lehtë për mua,” u ka thënë Clinton të pranishmëve.
“E di se shumë nga ju janë thellësisht të zhgënjyer nga rezultati i zgjedhjeve. Unë, gjithashtu, jam e zhgënjyer më shumë nga ç’mund ta shpreh.”
Hillary Clinton u ka rrëfyer pjesëmarrësve në aktivitet se gjatë kësaj kohe kishte dashur shumë që të mbyllej në shtëpi, të lexonte ndonjë libër, e të mos dilte fare.
“E di se shumë njerëz e kanë pyetur veten gjatë javës së shkuar nëse Amerika është vendi që ne mendonim të ishte,” ka thënë Clinton.
Pavarësisht notave pesimiste, kandidatja demokrate në zgjedhjet e fundit presidenciale ka shtuar këto fjalë, “Besoni në vendin tonë, luftoni për vlerat tona, dhe kurrë mos u dorëzoni.”
Që prej humbjes në zgjedhje, ajo është parë fare pak, dhe gjatë aktivitetit në fjalë mungonte ceremonialiteti i tepërt. /tesheshi.com/
