Forcat e misionit ushtarak të NATO-së në Kosovë, KFOR, në fund të muajit maj dhe fillim të qershorit, kanë përcaktuar vijën kufitare në mes të Kosovës dhe Serbisë në pjesën veriore të Kosovës. Ky fakt është ofruar kofidencialisht për tesheshi.com nga një burim brenda selisë së KFOR-it në Kosovë.
Por zyrtarë të KFOR-it në Prishtinë, kanë mohuar një informacion të tillë duke theksuar se KFOR-i nuk përcakton kufinj, por i mbron dhe i ruan ata në bashkëpunim edhe me forcat ushtarake të Serbisë.
Ndërsa burimi i portalit, faktin e ofruar e shoqëron dhe më të dhëna të detajuara. Sipas tij, një grup prej 10 të pjesëtarësh të KFOR-it të cilët janë të angazhuar në veri të Kosovës, së bashku me një grup prej 10 pjesëtarë të forcave ushtarake serbe, kanë bërë shenjimin e kufirit verior të Kosovës me Serbinë në gjysmën e parë të vitit të shkuar.
Burimi ka shtuar se kjo proçedurë e shenjimit të kufirit verior të Kosovës dhe Serbisë ka zgjatuar për rreth një muaj dhe është bërë me harta si dhe me pajisje të teknologjisë së lartë të tipit GPS (xhipies).
Por dhe këtë të dhënë, zyrtarë të press-qendrës së KFOR-it në Prishtinë e kanë mohuar. Përmes adresës elektronike i kanë thënë portalit tesheshi.com se KFOR-i nuk është i njohur për këto zhvillime. “Forcat e KFOR-it nuk kanë rol në përcaktimin e kufijve”, është theksuar prej tyre.
Sakaq, burime të tjetra i kanë thënë portalit tesheshi.com se përcaktimi zyrtarë i vijës kufitare me Serbinë pritet të bëhet gjatë këtij viti dhe do të jetë një punë shumë e vështirë.
“Nuk kemi informacione se çka ka bërë KFOR-i dhe cilën vijë administrative e ruan, pasi që institucionet vendore nuk kanë qasje në punët e KFOR-it se nga patrullojnë. Por dihet mirë se Serbia tani, me disa harta të veta ka bërë ndërrimin e vijës kufitare, e sidomos në një pjesë të Leposaviqit ku është e vendosur një bazë e radarëve të ushtrisë së ish-Jugosllavisë e cila në bazë të Kushtetutës së Krahinës Autonome të Kosovës, pra ish-shtetit të (RFSJ-së) të vitit 1974, kjo bazë ka qenë rreth 3 km në territorin e Kosovës”, ka thënë burimi.
Sipas tij, baza ushtarake e radarëve që është në veri të Kosovës, pra në territorin e Leposaviqit, ka dhe një veçori, pasi që në të ish-ushtria Jugosllave e Titos ka ndërtuar disa tunele që shërbejnë edhe për garazhimin e aeroplanëve luftarakë si janë ata ‘Mig 29’, që ka poseduar ushtria Jugosllave dhe tani posedon ushtria serbe.
“Kjo bazë ka një rëndësi shumë të madhe pasi që nga aty, pa asnjë problem monitorohet e tërë pjesa qendrore dhe jugore e Kosovës si dhe një pjesë e Maqedonisë e deri në Greqi”. ka thënë burimi, duke shtuar se baza ushtarake dhe e radarëve, edhe pse është në territorin e Kosovës, gjatë gjithë kohës ka qenë nën kontrollin e forcave ushtarake serbe, pra KFOR-i asnjëherë nuk ka pasuar qasje në këtë bazë. /tesheshi.com/
