Ajo çfarë ka ndodhur pasditen e së premtes në Elbasan e ka shndërruar tashmë PS-në e drejtuar nga Rama në bartëse të hijeve të PD-së sa i përket etikës në zhvillimet partiake, pikërisht në rastet kur ekzistojnë zëra kundër.
Në takimin e radhës në kuadër të anëtarësimeve në PS, një fushatë kjo e ndërmarrë nga Rama, deputeti Blushi, si deputet i qarkut, e ka marrë fjalën duke thënë se për të nuk ka rëndësi partia, por Shqipëria.
“E pyes përballë Edi Ramën, pse nuk do zgjedhje?”, ka thënë Blushi, i cili është përballur me thirrje kundër tij dhe pro Ramës, duke i ndërprerë dhe fjalën. Kjo ka çuar më pas në ashpërsimin e gjuhës së Blushit, që ka thënë se aty ka banditizëm. “S’kam frikë të them të vërtetën, vërshëlleni sa të doni.”
Më pas, pasi ka lënë sallën, Blushi ka pretenduar se brenda saj ka pasur dhe njerëz të armatosur; policia lokale e hedhur poshtë këtë pretendim të deputetit socialist.
Një skenë e tillë nuk ka ndodhur kurrë në historinë 25-vjeçare të PS-së. Të tilla episode kanë qenë të pranishme vetëm në radhët e PD-së në mesin e viteve ’90, ku në forma të ngjashme janë linçuar Zogaj, Selami apo ndonjë tjetër. /tesheshi.com/
