Nga Nada Dosti
Dje, më 1 shkurt 2020, u mbajt konferenca dedikuar kauzës ndërgjegjësuese ndaj diskriminimit të femrës me hixhab në shoqëri. World Hijab Day, është një nismë ndërkombëtare e cila ka përfaqësueset e veta për çdo shtet. Një herë në vit, më 1 shkurt, aktivistë të ndryshëm e organizata jo qeveritare organizojnë aktivitete të natyrave të ndryshme me qëllim sensibilizues.
Ambasadorja e kësaj nisme në Kosovë, Valbonë Bytyqi, e solli këtë event në Prishtinë nën moton “Unity in Diversity/Unitet në Diversitet”. Ndër panelistët e ftuar për të folur për kauzën e diskriminimit të femrave muslimane të cilat mbartin hixhabin ishin personalitete nga jeta fetare dhe shoqëria civile si: hoxhë Zekerija Bajrami i cili foli rreth temës me titull “Mbulesa, shtypje dhe imponim apo vlerë dhe adhurim?”; Nora Husejnoviç (juriste) e cila prezantoi temën “Liria e manifestimit të fesë dhe diskriminimi në institucionet publike”; Labinota Demi Murtezi (deputete) me temën “Shamia, kornizë apo integritet?”, Arian Xhezairi (sociolog) referoi temën “Në mes shumë zjarresh: pranimi i realitetit dhe gjetja e forcës për t’u përballë dhe për të ngadhënjyer mbi të!”.
Pra të gjitha tema të cilat sfidojnë stereotipe të shumta lidhur me shaminë, nxisin reflektim, si dhe ngrejnë dhe shqetësimin e përballimit me sfida të ndryshme dhe në sfera të ndryshme.
Konferenca u hap me fjalimin përshëndetës të vetë ambasadores së nismës si dhe një përshkrim të aktivitetit. Dhe në fund iu dha mundësia edhe publikut që të parashtronin pyetje apo të shprehnin komente, shqetësime në një bashkëbisedim me panelistët.
Paralelisht, edhe në Republikën e Maqedonisë së Veriut është organizuar një aktivitet modest nga Unioni Studentor Shqiptar (USSH) nën moton “Emancipimi i gruas me shami në shoqëri”. Pritet që në ditët në vijim të organizohet edhe në Tiranë aktiviteti i radhës me rasin e 1 Shkurtit – Ditës së Hixhabit. /tesheshi.com/
