Një operacion auditi nga Kontrolli i Lartë i Shtetit, institucion që drejtohet nga Bujar Leskaj i PD-së, ish-ministër Kulture në qeverisjen “Berisha”, thuhet se ka konstatuar shkelje në procedurën e shembjes së godinës së vjetër të Teatrit Kombëtar.
“..Përsa i përket shkeljeve të konstatuara në lidhje me ndryshimin apo përcaktimin e kufijve të qendrës historike të qytetit të Tiranës, të cilat janë pasuar me ngjarjen e fundit të prishjes së godinës së Teatrit Kombëtar, KLSH ka paraqitur indicje penale pranë Zyrës së Prokurorisë Tiranë”, thuhet në raport, pas renditjeve të shkeljeve.
Për më tepër, kërkohet që Teatri të ndërtohet nga e para, ashtu siç ishte, një kërkesë që përputhet dhe tekstualisht me atë që kërkojnë budinajt, vëllezërit që udhëheqin kauzën e TK, në krye të Aleancës për Teatrin.
“Për adresimin e problematikave të shfaqura mbi çështjen e Teatrit Kombëtar dhe propozimin për pezullimin e vendimmarrjeve mbi këtë objekt nga Kryetari i Bashkisë dhe Këshilli Bashkiak i Tiranës”, t’i kërkojë Këshillit të Ministrave dhe Bashkisë Tiranë, rindërtimin e godinës së Teatrit Kombëtar në zonën ku ka qenë godina e mëparshmë, në të njëjtin stil dhe pamje arkitektonik që ajo ka pasur, me të njëjtat volume dhe në të njëjtin projekt”, thuhet në raport. /tesheshi.com/
