Juventusi bëhet gati të kryejë një prej transferimeve më të bujshme të kësaj vere në futbollin italian, pasi ka gjetur gjuhën e përbashkët me argjentinasin Gonzalo Higuain, golashënuesin më të mirë të sezonit të shkuar në Seria A.
Siç njofton portali i njohur goal.com, ekipi i njohur torinez ka arritur tashmë një marrëveshje me lojtarin për një kontratë katërvjeçare. Shtatë milionë euro është shuma që do t’i paguhet lojtarit në sezon, gjithnjë sipas informacioneve të këtij portali sportiv.
Higuain është një prej lojtarëve më të kërkuar në këtë sezon transferimesh, me Arsenalin që është seriozisht i interesuar për të.
Megjithatë, ngjan që argjentinasi ta ketë bërë zgjedhjen e tij, ndërkohë që duhet zgjidhur çështja e klauzolës së lirimit.
Drejtori i përgjithshëm i Juventusit, Giuseppe Marotta, pritet të takohet në ditët në vijim me drejtuesit e Napolit për t’i dhënë zgjidhje situatës. 94 milionë euro është shifra e klauzolës së lirimit të Higuain-it, por te Juventusi nuk janë të gatshëm ta paguajnë këtë shumë. Në vend të kësaj, do të propozohen një numër lojtarësh si shkëmbim.
Edhe pse mund të zgjasë si histori, janë të gjitha mundësitë që në nisje të sezonit të ri ta shohim Gonzalo Higuain-in me bluzën e kampionëve të Italisë.
Higuain do të zbarkonte në Europë në vitin 2007, për të kaluar gjashtë vite te Reali i Madridit. Në 2013-tën ai do të transferohej te Napoli, ku me gjithë paraqitjet e tij të jashtëzakonshme nuk do të mund ta çonte ekipin drejt titullit kampion, aq të dëshiruar. Tre vite më pas ai kërkon një aventurë të re, te një ekip ku mundësia për të fituar trofe është shumë herë më e madhe. /tesheshi.com/
