Në Nion të Zvicrës është hedhur shorti për fazën “play-off” të Ligës së Kampioneve, ku janë përcaktuar dhjetë çiftet nga të cilat do të dalin skuadrat që do të vazhdojnë rrugëtimin e tyre në fazën e grupeve.
Një përballje mjaft interesante do të jetë edhe ai mes gjermanëve të Hofenhajmit dhe anglezëve të Liverpulit, me ndeshjen e parë që do të zhvillohet në Gjermani.
Ndërkohë që fati nuk i ka buzëqeshur shumë skuadrave ku luajnë disa nga lojtarët shqiptarë.
Bashakshehiri i Sokol Cikalleshit apo Napoli i Elseid Hysajt nuk kanë patur aspak fat në short. Skuadrat ku ata aktivizohen do të kenë përballë Sevilian dhe Nisën, skuadra francize ku luan sulmuesi Mario Baloteli.
Karabaku i Ansi Agollit do të ndeshet me kampionët e Danimarkës, Kopenhagën. Ndërsa, Maribori i Valon Ahmedit do të ketë përballë Hapoel Bir-Shevën, skuadër izraelite.
Olimpiakosi që drejtohet nga Besnik Hasi është vënë përballë kampionëve të Kroacisë, Rijekës.
LIGA E KAMPIONEVE – FAZA “PLAY-OFF”
Karabak (Azerbajxhan) – Kopenhagë (Danimarkë)
APOEL (Qipro) – Sllavia Pragë (Çeki)
Olimpiakos (Greqi) – Rijeka (Kroaci)
Sëlltik (Skoci) – Astana (Kazakistan)
Hapoel Bir-Sheva (Izrael) – Maribor (Slloveni)
Istanbul Bashakshehir (Turqi) – Sevilja (Spanjë)
Jang Bojs (Zvicër) – CSKA Moskë (Rusi)
Napoli (Itali) – Nisë (Francë)
Hofenhajm (Gjermani) – Liverpul (Angli)
Sporting Lisbonë (Portugali) – Steaua Bukuresht (Rumani) /tesheshi.com/
