Lëvizja militante shiite Hezbullah, e vendosur që në fillim të konfliktit sirian në krah të Beshar Esadit, po bëhet gati të dërgojë trupa të tjerë në Siri. Synimi është shtimi i mbështetjes për trupat qeveritare në luftën kundër grupeve opozitare.
Ndërkohë që mbante një fjalë në jug të Libanit, drejtuesi i bordit ekzekutiv të Hezbullahut, Nebil Kauk, do të deklaronte, “Në këto rrethana, ne do ta shtojmë forcën tonë të trupave në Siri.”
“Nuk kemi ngurrim të veprojmë kështu,” u shpreh ai pa mëdyshje.
Hezbullahu nuk e ka fshehur asnjëherë mbështetjen për regjimin e Esadit, dhe lufton në Siri ndaj grupeve rebele që prej vitit 2011.
Më tepër se një mijë trupa të Hezbullahut janë vrarë që nga fillimi i konfliktit në Siri. Kështu bën të ditur Observatori Sirian për të Drejtat e Njeriut. Lëvizja shiite nuk ka dhënë gjer tani asnjë shifër të të vrarëve të saj.
Muajin e shkuar do të vritej në Damask, nga një sulm me artileri, Mustafa Bedreddin, një prej figurave kryesore ushtarake të Hezbullahut. /tesheshi.com/
