Pas analizimit të kutive të zeza, hetuesit janë të bindur gati plotësisht se zhurma e dëgjuar në kabinën e pilotëve të avionit rus ishte një shpërthim i shkaktuar nga një bombë.
Këtë gjë do ta pohonte një hetues egjiptian në ekipin hulumtues, por pa dhënë emrin e tij. “Jemi 90 për qind të sigurt se ishte një bombë.”
Të njëjtën pikëpamje do të ofronte dhe gazeta The Sunday Times, duke iu referuar informacioneve nga shërbimi britanik i inteligjencës, që beson se avioni u rrëzua nga një bombë.
Ndërkaq, presidenti rus ka nënshkruar një urdhër që i pezullon të gjitha fluturimet e pasagjerëve për në Egjipt. I njëjti urdhër u sugjeron kompanive turistike që ta ndalojnë organizimin e udhëtimeve drejt Egjiptit, veçanërisht të atyre që parashikojnë fluturimin me avion.
Ka vijuar në të njëjtë kohë kthimi masiv i rusëve nga Egjipti. Vetëm në 24 orët e fundit janë kthyer 11.000 veta, ndërsa pritet që Egjiptin ta braktisin dhe mijëra turistë të tjerë.
Avioni rus u rrëzua tetë ditë më herët, vetëm 23 minuta pasi qe ngritur në fluturim nga Sharm el-Sheikhu. Pasagjerët dhe ekuipazhi, gjithsej 224 persona, gjetën vdekjen. /tesheshi.com/
