Ministri i Jashtëm rus, Sergei Lavrov, ka deklaruar në nisje të bisedimeve trepalëshe në Moskë me homologun turk dhe atë iranian se hetuesit rusë kanë mbërritur në Turqi për të ndihmuar në hedhjen dritë mbi vrasjen e ambasadorit Andrei Karlov.
“Presidentët tanë ranë dakord që veç veprimeve të ndërmarra nga shërbimet speciale turke, drejt Turqisë të fluturojë dhe një grup hetues rus,” raportohet nga agjencia e lajmeve AFP t’i ketë thënë Lavrov homologut turk.
Lavrov ka konfirmuar gjithashtu se i njëjti avion do të kthejë në Rusi trupin e ambasadorit të vrarë.
Një ceremoni pritet të zhvillohet në aeroportin e Ankarasë për t’i dhënë lamtumirën ambasadorit rus.
Sergei Lavrov dhe Mevlüt Çavuşoğlu kanë vënë sot lule para një portreti të diplomatit të ndjerë. Ministri turk e ka njoftuar Lavrov-in gjithashtu se rruga ku gjendet ambasada ruse do të marrë emrin e zyrtarit të saj më të lartë, të vrarë dje në mbrëmje. /tesheshi.com/
