Një fotoreporter ukrainas dhe një ushtar që ishte me të u vranë në javët e para të pushtimit rus dhe duket se ata u “likuiduan gjakftohtësisht” nga trupat ruse, përfunduan pas hetimeve Reporterët pa Kufi.
Trupat e Max Levin dhe ushtarit Oleksiy Chernisov u gjetën më 1 prill në një pyll pranë Huta-Mezhihirska, një fshat 30 kilometra në veri të Kievit.
Grupet e lirisë së medias kanë spekuluar se Levin mund të ketë kërkuar dronin me të cilin ka realizuar fotot, në një pyll të kontrolluar nga forcat ruse.
Gazetarët pretendojnë se Levin mbante një shirit blu, të ngjashëm me atë që mbanin ushtarët ukrainas.
Ai ndante herë pas here me ushtrinë ukrainase informacione për vendndodhjen e trupave ruse të mbledhura falë dronit.
Levin dhe Chernisov u zhdukën më 13 mars dhe GPS nga automjeti i tyre tregoi një vendndodhje në pyllin në veri të Kievit.
Fotoreporteri humbi një dron në rajon më 10 mars, të cilin nuk e gjeti për shkak të zjarrit rus.
Reporterët pa Kufij numëruan 14 vrima plumbash në makinën e djegur të viktimave. Në trupin e Levinit nuk ka pasur djegie, ndërsa ai është goditur me tre plumba, një në gjoks dhe dy në kokë.
“Ai është vrarë me siguri nga një, dhe ndoshta dy plumba në distancë të afërt, kur ai ishte tashmë në tokë”, thuhet në raport. /tesheshi.com/
