Nga Blendi Gashi
Kanë kaluar pesë vjet që kur në Parlamentin e Kosovës është kërkuar nga deputetët e opozitës formimi i një Komisioni hetimor rreth veprimtarisë së Shërbimit Informativ të Kosovës (SHIK), të cilin e ka udhëhequr kreu aktual i institucionit ligjvënës, Kadri Veseli, por një iniciativë e tillë ka dështuar qysh në fillim.
Ish-deputeti i AAK-së, Burim Ramadani, është ligjvënësi i parë që kërkoj zyrtarisht hetimin e SHIK-ut, me ç’rast në mars të vitit 2011-të paraqiti në Kuvend iniciativën e themelimit të komisionit hetimor parlamentar.
Por kjo kërkesë ka mbetur veç në letër pasi nuk u realizua asnjëherë.
Në fillim të vitit 2015, subjektet opozitare patën filluar mbledhjen e nënshkrimeve të deputetëve, në mënyrë që të krijohet Komisioni kuvendar për hetimin e SHIK-ut, por kjo nismë dështoi pasi ata nuk arritën t’i sigurojnë nënshkrimet e 40 deputetëve sa nevojiten për formimin e komisionit.
Opozita kosovare në vazhdimësi ka fajësuar partinë në pushtet, Lidhjen Demokratike të Kosovës (LDK) për mosfunksionalizimin e këtij komisioni, pasi shumica e deputetëve të këtij subjekti nuk dhanë nënshkrimet e tyre, edhe pse ishin më e zhurmshmit në vitet e pasluftës sa i përket veprimtarisë së SHIK-ut.
Vlen të theksohet se një prej deputeteve më të zëshme në LDK, rreth veprimtarisë së SHIK-ut, Melihate Tërmkolli, papritur ndërroi mendjen dhe tërhoqi nënshkrimin e dhënë për formomin e Komisionit për të hetuar SHIK-un, pa dhënë ndonjë arsye të qartë pse bëri një gjë të tillë.
Ish-deputeti Ramadani: Politika e ka legjitimuar SHIK-un
Portali tesheshi.com ka kontaktuar me inicuesin për formimin e komisionit parlamentar për SHIK-un, Burim Ramadanin i cili pas pesë vitesh rikujton kohën kur ka ndërmarrë një veprim të tillë.
Ai thotë se kur e ka nisur iniciativën, nuk e ka njohur mjaftueshëm skenën politike në vend, por si një ligjvënës i ri dhe pa të kaluar pengmbajtëse, ka menduar se është më mirë për politikën kosovare dhe vendin që të përmbyllej diskursi rreth SHIK-ut.
“Pavarësisht rezultateve që do të mund të dilnin, ky lloj debati çoroditës do të përmbyllej. Në fakt, kjo ka qenë pothuajse fjalia kryesore edhe në fjalimin tim në Kuvend atëherë. Tash pesë vjet më vonë, ky diskurs fatkeqësisht ka mbetur pothuajse i njëjtë”, ka thënë Ramadani për tesheshi.com.
Sipas tij, politika në përgjithësi e ka legjitimuar SHIK-un, ani pse e përdor në diskurs publik sipas nevojave elektorale dhe kryesisht nga ajo pjesë e politikës që ka dhënë prova të kundërta në praktikë.
Opozita s’heq dorë për hetimin e SHIK-ut
Edhe pse dështuan për pesë vite të formojnë komisionit parlamentar për të hetuar SHIK-un e Kadri Veselit, opozita kosovare nuk do të zbrapset por do të vazhdojë përpjekjen për të mbledhur 40 nënshkrimet e nevojshme, edhe pse këtë legjislaturë e pranojnë se vështirë se mund të ndodh një gjë e tillë.
Parita më e madhe opozitare në vend, Lëvizja Vetëvendosje ja lë fajin edhe deputetëve të mazhorancës për moshetimin e SHIK-ut, pasi thotë se hezituan të përkrahin kërkesën e ish-deputetit Ramadani.
Ish-deputeti i PDK-së, Smajl Kurteshi, tani deputet i VV-së i cili gjendet në arrest shtëpiak, ka thënë se opozita asnjëherë nuk ka hequr dorë për krijimin e komisionit në fjalë, por kjo nuk po ndodh pasi nuk ka përkrahje edhe nga disa deputetë të pozitës.
“Opozita ka arritur t’i bëj 39 nënshkrime por asnjëherë nuk ka arritur t’i bëj 40. LDK-ja e cila kërkonte me shumë zhurmë hetimin e SHIK-ut tani ka hequr dorë dhe një gjë e tillë është e pamundur. Por, ne jemi për t’i hetuar të gjithë ata individë dhe organizata të cilat kanë vepruar në të kaluarën dhe dyshohet se kanë keqpërdorur pozitën e tyre”, ka thënë Kurteshi, për portalin tesheshi.com.
Salihaj: Hetimin e SHIK-ut do të duhej ta bënte prokuroria
Deputeti i LDK-së, Adem Salihaj, i cili drejpërsëdrejti bën përgjegjës SHIK-un për vrasjet e pasluftës, mendon se gjatë këtij mandati nuk ka kushte për formimin e një komisioni hetimor për SHIK-un, sepse asgjë nuk ka ndryshuar në qëndrimet e partive politike, derisa shpreson që një gjë e tillë të ndodh në një mandat tjetër.
Salihaj, në një prononcim për tesheshi.com thotë se edhe nëse opozita do t’i mblidhte 40 nënshkrime, vështirë që do të arrihej ndonjë rezultat, kur dihet se deputetët e PDK-së dhe shumica e deputetëve të LDK-së ishin kundër, dhe nuk do të mund të nxirrej një raport real e as që nuk do t’i merrte votat në Kuvend.
“Si do që të jetë, ky komision nuk u formua dhe nuk u bë asnjë përpjekje për hetimin e SHIK-ut, e cila, siç dihet, ishte një organizatë kriminale jashtligjore. Por, zgjidhja është që hetimin do të duhej ta bënte prokuroria, aty do të kishte shanse që të zhvishet kjo organizatë kriminale. Siç e dini, as kjo tash për tash nuk do të ndodh”, ka thënë Salihaj për tesheshi.com.
Ndryshe, SHIK-u, i njohur si organizatë e afërt sidomos me Partinë Demokratike të Kosovës, shpalli përfundimin e aktiviteteve të veta më 14 qershor të vitit 2008 nga shefi i këtij shërbimi, Kadri Veseli.
Shuarja zyrtare e SHIK-ut u cilësua edhe nga ndërkombëtarët si një kusht i domosdoshëm për t’i lëshuar vendin strukturës së re të inteligjencës së Kosovës, të quajtur Agjencia e Kosovës për Inteligjencë. /tesheshi.com/
