Policia në arrati Emiljano Nuhu, njeriu që ka trazuar politikën me denoncimet e tij ndaj rastit të djalit të deputetit Rahman Rrahja, ku pretendon se i është vënë pistoleta në kokë, madje dhe në prezencë të Taulant Ballës, është nxjerrë një mashtrues nga eprorë e kolegë të SHÇBA-së.
Kjo e fundit, si instancë hetuese e çdo praktike, ka konkludar se asgjë prej atyre që ka thënë ish-efektivi i Komisariatit të Fushë – Krujës, nuk është e vërtetë
“Nga ky aktivitet, deri tani janë verifikuar disa rrethana dhe fakte:
- Nga intervistat e drejtuesit dhe punonjësve të Policisë së Stacionit Fushë Krujë rezulton se më datë 21/07/2018, pra data e pretenduar, nga ish punonjesi Nuhu nuk ka qenë fare prezent në ambientet e Stacionit të Policisë Fushë Krujë.
- Nga Urdhri i Brendshëm për planëzimin e shërbimit, rezulton se, më datë 21/07/2018, Emiljano Nuhu nuk ka qenë OPGJ i gatshëm, por një tjetër punonjës i Policisë së Shtetit.
- Nga intervistat dhe dokumentet si dhe shqyrtimi i pamjeve filmike në dispozicion, nuk rezulton që personat e përmendur në intervistë, si kërcënues të tij, të kenë qenë prezent në ambientet e Stacionit të Policisë së Shtetit në fushe Krujë, as në këtë datë dhe as në ndonjë datë tjetër të mëvonshme.
- Nga Urdhri i Prokurorit të Rrethit Gjyqësor Krujë, rezulton se vetëm në datë 27/07/2018, Emiljano Nuhu është ngarkuar për hetimin e kësaj çështjeje.
- Nga shqyrtimi i fashikullit të hetimit rezulton se nga 11 veprime hetimore të deleguara nga Prokurori i çështjes, Emiljano Nuhu ka kryer vetëm 4 prej tyre.
- Nga ekzaminimi i pamjeve filmike dhe komunikimeve elektronike, rezulton se Emiljano Nuhu takohet, ndër të tjerë, me personin nën hetim, në ambientet e një lokali privat, në Tiranë më datë 30/07/2018. Nga pamjet dhe komunikimi elektronik krijohet bindja e një takimi mes personash të njohur, më gjate kjo eshte nje rrethane qe do te verifikohet nga organet qe udheheqin hetimin ne kete rast.
- Nga dokumentet rezulton se Emiljano Nuhu nuk paraqitet në detyrë që nga data 14/09/2018.
- Më datën 15/09/2018, Emiliano Nuhu, rezulton të ketë udhëtuar nga aeroporti i Prishtinës drejt një vendi të Bashkimit Europian. Në sistemet e Republikës së Shqipërisë apo ato të Republikës së Kosovës, Emiliano Nuhu nuk rezulton i regjistruar në hyrje-dalje, në asnjërën nga Pikat e Kalimit Kufitar Shqiptare apo Kosovare.
- Me datën 16.09.2018, Emiliano Nuhu, i ka telefonuar nga jashtë Shqipërisë, punonjës policie, të cilit i ka kërkuar të marrë armatimin personal, pistoletë, te cilen e kishte lene tek vjehrri i tij, për ta dorëzuar më pas.se
Nga ana tjetër, nr.2 i Policisë së Shtetit, Aida Hajnaj, tha policia ka vijuar procedimin ndaj shtetasit Rexhep Rraja – djali i deputetit socialist – edhe pas tërheqjes së denoncimeve nga shtetasja e dhunuar Xhisiela Maloku, por ndërkohë, sipas krerëve të lartë të policisë, oficer Emiljano Nuhu nuk ka vepruar në përputhje me ligjin
“Sqarojmë se marrja në pyetje e shtetasit Rexhep Rraja, marrja e tabulateve si dhe këqyrja e telefonit për këtë shtetas, ka qenë detyra e parë e deleguar nga Prokurorja e çështjes, dhe që nuk janë zbatuar“, tha znj. Hajnaj.
Pra, polici në arrati që për opozitën është shndërruar në referencë për denoncimin e krimit në pushtet, siç dhe pretendon, çedon rëndë në aspektin profesional, pasi rezulton dhe mashtrues dhe abuzues me detyrën.
E ndërkohë, në gjithë këtë zhvillim, nuk trajtohet një tjetër aspekt; tradhëtia që oficer Nuhu i ka bërë uniformës dhe betimit ushtarak. Ikja e tij, që rezulton të jetë dhe arratisje, është dhe një dezertim nga detyra.
Të jesh punonjës rendi, ushtarak, gjëja e parë me të cilën ballafaqohesh kur i futesh këtij profesioni, është pikërisht risku me jetën.
Puna e do që t’i dalësh ballë së keqes që kërcënon publiken, rendin, jetën e njerëzve nga taksat e të cilëve paguhesh, dhe kjo do të thotë që jeta jote të jetë dhe në rrezik hera-herës.
Dhe në këtë aspekt, edhe nëse do i kërcënohej jeta, siç pretendon, kjo është deri diku normale në këtë profesion dhe ai duhet ta vijonte punën e tij, pra luftën me të keqen. Është një pakt që vetë e ka “firmosur”, qyshse ka pranuar të vesh uniformën e oficerit policor për zbatimin e ligjit. Ndërsa ai ia ka mbathur, në një akt të qartë dezertues, duke iu bashkuar një tjetër dezertori, tradhëtari të unformës, Dritan Zaganit. Po, edhe mund t’u kërcënohej jeta, edhe mund t’u bëhej padrejtësi, por kjo ka qenë zgjedhja e tyre qyshse pranuan të jenë nën armë. Dhe si dezertorë, që ndryshe klasifikohen dhe si tradhëtarë, atyre nuk iu vlejnë denoncimet, edhe në patçin ndonjë të vërtetë në to. /tesheshi.com/
