Gjatë seancës së parë të komisionit hetimor parlamentar për presidentin Meta, nën akuzën se ka shkelur rëndë Kushtetutën me anullimin e njëanshëm të 30 Qershorit, deputeti i opozitës së re nga lista e PD-së, Halit Valteri, ka qenë tejet i ashpër me kreun e shtetit, “baba” i LSI. Duke iu drejtuar me një pyetje konkrete Metës mbi anullimin e zgjedhjeve, se në cilin nen të Kushetutës ishte bazuar, Valteri e cilësoi presidentin si një çorapbërës të politikës në 30 vite.
“Cili nen i Kushtetutës jep të drejtën të anuloni datën e zgjedhjeve me një datë tjetër?
‘Nuk munda t’i ul palët’, thoni. Ju jeni President i Republikës. Në rast se nuk arrini dot të ulni palët politike kur keni 30 vjet që e bëni çorap këtë vend, ata nuk ju marrin seriozisht dhe ju kot sa e ushtroni këtë detyrë që keni
Nëse zgjedhjet do bëheshin më 13 tetor, gjë që nuk ka asnjë shans pasi kanë kaluar afatet, a do t’i quanit legjitime kur PD ka deklaruar se nuk do të marrë pjesë?”, ishin fjalët e deputetit të ri, ku pikërisht në pikë Meta tentoi ta delegjitimonte.
“Së pari përgjigjet i dhashë më parë, por kuptohet që parlamentarizmi është edhe eksperiencë edhe përvojë, ajo që mund t’ju them deputetëve është se Kushtetuta ja lejon të drejtën presidentit të nxjerrë dekrete. Presidenti ka nxjerrë një dekret për shfuqizimin e datës dhe jo të zgjedhjeve, për të krijuar mundësinë për një datë të re që të ketë zgjedhje. Janë disa presidentë të Republikës që kanë vepruar në një mënyrë të tillë apo të ngjashme për shkak të rrethanave për të ç’tensionuar situatën në zgjedhje. Këtu ka dhe deputetë me eksperiencë që mund t’ia shpjegojnë kujtdo tjetër”, ishte argumentimi i kreut të shtetit. /tesheshi.com/
