Nga Blendi Gashi
Rreth 300 veteranë dhe invalidë të UÇK-së, të hënën bllokuan dyert e qeverisë dhe Kuvendit duke kërkuar rishikimin sa më pare të buxhetit në mënyrë që të marrin pensionet e tyre.
Ata edhe pas takimit me kryeministrin Haradinaj dhe këshilltarin e Kadri Veselit nuk arritën një dakordësi për çka dhanë afat deri më 25 tetor të bëhet një zgjidhje në të kundërtën paralajmëruan se do të hyjnë në grevë.
Edhe pse zyra e Kryeministrisë informon për çdo takim që mban kryeministri, në faqen e saj të datës 9 tetor nuk ka informata për takimin me veteranët, ndërsa për të gjitha takimet tjera po.
Kryeministria hesht për takimin e zhvilluar me veteranët dhe invalidët, këta të fundit pas takimit citojnë Haradinajn t’iu ketë thënë se i ka dhënë 1 muaj kohë Prokurorisë për të hetuar listat e veteranëve dhe për të ngritur kallëzime penale për ata që e keqpërdorin këtë status.
Kjo deklaratë më pas ngjalli reagime nga krerët e drejtësisë të cilët thonë se është e papranueshme që politika t’i shtrijë duart në institucionet që ata drejtojnë.
Kryeprokurori i Shtetit, Aleksandër Lumezi, tha se institucioni të cilin e drejton ai nuk do të ndikohet nga asnjë person juridik apo fizik rreth afateve të trajtimit të rasteve.
“Sa i përket afatit të hetimeve është e përcaktuar me dispozitat e Kodit të Procedurës Penale dhe askush nuk mund t’i ndryshojë afatet ligjore”, ka thënë Lumezi për mediat.
Edhe kryeprokurori i Prokurorisë Speciale, Reshat Millaku, ka reaguar duke thënë se për punën e institucionit që drejton nuk ndikohet nga politika.
“Do të angazhohemi që sa më shpejtë që është e mundur (t’i kryejmë hetimet). Por ne i kemi afatet ligjore, nuk ndikohemi nga politika”, ka pohuar Millaku për mediat.
Ja ç’thonë opozita dhe njohësit e drejtësisë
Opozita dhe njohësit e fushës së drejtësisë thonë se kryeministri në asnjë rrethanë nuk guxon të bëjë presion mbi drejtësinë, pasi Kushtetuta garanton ndarjen e pushteteve.
Shqipe Pantina, deputete nga Lëvizja Vetëvendosje e pranon se çështja e dhënies së statusit të veteranëve se duhet të hetohet nga Prokuroria por sipas saj politika nuk duhet të ndërhyjë në sistemin e drejtësisë.
“Deklarata e kryeministrit e konfirmon saktë se sa e ndikuar është drejtësia nga politika.
Ndonëse gjyqësori duhet të jetë i pavarur nga politika, fatkeqësisht asnjëherë deri më tani nuk ka qenë kështu.
Neve na duhet një gjyqësor profesional që nuk lejon ndikime apo ndërhyrje nga politika”, thotë Pantina për tesheshi.com.
Ehat Miftaraj, nga Instituti i Kosovës për Drejtësi (IKD) thotë se Kushtetuta dhe ligji garanton pavarësinë dhe ndarjen e pushteteve në Kosovë.
Ai më tej thotë se nëse vërtet kryeministri ka bërë një deklaratë të tillë atëherë kjo është ndërhyrje e drejtpërdrejtë e pushtetit ekzekutiv në pavarësinë e pushtetit gjyqësorë, respektivisht sistemit prokurorial në Kosoë.
“Afatet e hetimit, ndjekjes penale dhe gjykimit janë të përcaktuara me Kod të Procedurës Penale andaj jo vetëm caktimi i afateve në këtë rast por edhe çdo diskutim lidhur me çështje penale në procedurë nga ana e legjislativit apo ekzekutivit përbën ndërhyrje dhe shkelje të parimeve kushtetuese dhe ligjore të organeve të pavarura”, thotë Miftaraj për tesheshi.com.
Portali ynë ka tentuar gjatë ditës të marrë një qëndrim nga kabineti i Haradinajt nëse kjo deklaratë u është thënë në këtë formë veteranëve por kontakti me kabinetin ka qenë i pamundur. /tesheshi.com/
