Tetsuya Yamagami, njeriu që vrau ish-kryeministrin japonez Shinzo Abe, ka pranuar në polici se ka tentuar të prodhojë një bombë, thanë të dielën hetuesit japonezë.
Yamagami gjithashtu deklaroi se ai “krijoi më shumë armë”, raportoi agjencia e lajmeve Kyodo.
Policia kontrolloi shtëpinë e tij në qytetin perëndimor Nara, duke sekuestruar armë të bëra me dorë, të ngjashme me ato të gjetura në skenën e vrasjes së Abe-s.
Sa i përket motivit të sulmit ndaj ish-kryeministrit, Yamagami tha se nëna e tij kishte bërë një “donacion të madh” për një organizatë fetare që ai besonte se ishte e lidhur me Abe-n dhe se ai ishte i zemëruar për shkak të tij, duke besuar se Abe po promovonte organizatën.
Një nga burimet e agjencisë japoneze pohoi se Yamagami tha se ai “fillimisht synonte të sulmonte një udhëheqës të një grupi fetar, por vendosi të qëllonte Abe-n në vend të tij”.
Yamagami, aktualisht i papunë, kishte punuar në një fabrikë në rajonin e Kansait që nga vjeshta 2020, por u largua në maj të këtij viti, sipas një agjencie punësimi.
Ai ishte më parë anëtar i Marinës Japoneze për rreth tre vjet, deri në gusht 2005. /tesheshi.com/
