Vala e arrestimeve këtë të enjte, ku mendohet se janë si rezultat i pendesës së famëkeqit Nuredin Dumani, kanë çuar në zbulimin e një sage atentatesh të pandodhura për larje hesapesh mes grupeve kriminale në vend, ku përfshihen emra të bujshëm të krimit.
Kështu, për Talo Çelën, një nga personat më të kërkuar në Shqipëri, i akuzuar për disa vrasje, thuhet se ai siguroi mjete për të vrarë Sokol Sanxhaktarin, ndërkohë që tentoi për të vrarë edhe Florenc Çapjan, por atentati dështoi.
Më tej, pas tentativës për të vrarë Çapjan, në orët e para të mëngjesit të 5 nëntorit 2020, në vilën dykatëshe të Talo Çelës është vendosur një sasi prej më shumë se 2.8 kilogram tritol, me qëllim për ta hedhur në erë banesën e tij. Raportohet se ai që vendosi lëndën plasëse ishte Elio Bitri, ndërkohë që tritoli shpërtheu vetëm në pjesën e jashtme, ndërsa pjesa tjetër mbeti e pashpërthyer
Gjithashtu, sipas SPAK, dyshohet se Ervis Martinaj porositi vrasjen e Endrit Dokles pas lirimit të tij nga burgu. Në dosjen e SPAK thuhet se Martinaj i ka dhënë Nuredin Dumanit 100 mijë euro që të ekzekutonte Edrit Doklen, por që ky i fundit nuk e ka kryer “porosinë”.
Ndërkohë, vrasjen e Emiljano Ramazanit e dyshohet se e ka kryer Skerdi Tasi, ndërsa shofer ditën kur ndodhi ngjarja ishte Henrik Hoxha.
Emiljano Ramazani u ekzekutua pasditen e 20 korrikut 2021 poshtë pallatit të tij në Elbasan. 39-vjeçari u ndoq nga autorët nga palestra për në banesë, ndërsa u qëllua teksa ishte në automjetin e tij, duke mbetur i vdekur. /tesheshi.com/
