Formularët e 806 zyrtarëve ose 20% e listës totale prej 3900 zyrtarëve të lartë që e kanë bërë deklarimin e rregullt vjetore do t’i nënshtrohen kontrollit të plotë të pasurisë nga ana e Agjencisë kundër korrupsionit.
Kurse, në rast se Agjencia gjenë parregullsi në deklarimin e pasurisë, atëherë ndaj këtyre zyrtarëve do të ushtrohet kallëzim penal. Në këtë listë është edhe zëvendëskryeministri dhe ministri i Drejtësisë Hajredin Kuçi.
Përveç tij, gjatë shortit që është hedhur sot nga Agjencia anti-korrupsion është edhe kryeministri i Kosovës, Isa Mustafa, zëvendësministri i mjedisit, Mergim Rugova, kryetari i komunës së Prishtinës, Shpend Ahmeti, zëvendësministri i Zhvillimit Ekonomik, Gani Koci, zëvëndësministri i kulturës, Rexhep Hoti, deputetja Njomza Emini, si dhe zyrtarë të tjerë.
Drejtori në largim i AKK-së, Hasan Preteni tha se agjencia ka marrë të gjitha masat ligjore që të dhënat e tyre t’i krahasojnë me të dhënat e deklaruara nga zyrtarët e lartë.
Preteni ka theksuar se duhet një qasje interaktive e bashkëpunimit në mënyrë që të gjejnë zyrtarët që punojnë për xhepat privat.
Ndryshe, vitin e kaluar AKK, ka kontrolluar 799 formularë, ku ndaj 43 rasteve është ushtruar kallëzim penal.
Lista e zyrtarëve publik që do t’i nënshtrohen kontrolli të pasurisë publike do të publikohet edhe në faqen e Agjencisë kundër korrupsion.
/tesheshi.com/
