Agjentët e FBI-së kontrolluan shtëpinë e Donald Trump në Palm Beach, Florida, domethënë rezidencën e tij në Mar-a-Lago. Dokumentet presidenciale u kërkuan nën dyshimin se ish-presidenti kishte tjetërsuar dhe fshehur disa dokumente të rëndësishme sekrete. Ai dihet se ka shkatërruar disa në tualetin e Shtëpisë së Bardhë. Pyetja është nëse këto dokumente mund të dëmtojnë sigurinë amerikane.
Fokusi i kërkimit ishte në zyrën dhe zonat personale të Trump.
Disa nga bashkëpunëtorët e Trump, gjatë kohës që ai ishte në Shtëpinë e Bardhë, thonë se ai i ka trajtuar me shumë shkujdesje dokumentet e klasifikuara.
Trump konfirmoi kërkimin, por nuk pranoi të thoshte pse erdhën agjentët e FBI-së. Në një deklaratë të gjatë, ai tha se FBI po kryente një kontroll në pronën e tij në Mar-a-Lago dhe pretendoi se agjentët kishin thyer një kasafortë.
Veprimi thuhet se lidhet me një hetim nëse Trump ka marrë dokumente të klasifikuara nga Shtëpia e Bardhë në rezidencën e tij në Florida.
Trump: Bastisja, as e nevojshme dhe as e përshtatshme
Veprimi, i cili nuk u konfirmua menjëherë nga FBI dhe Departamenti i Drejtësisë, vjen pasi Trump ka njoftuar se do të kandidojë edhe një herë për president. Edhe pse urdhri i bastisjes nuk sugjeron se kallëzimet penale janë të pashmangshme apo edhe të pritshme, FBI duhet të provojë se ata kanë arsye të besojnë se një krim ka ndodhur.
“Pas punës dhe bashkëpunimit me agjencitë përkatëse qeveritare, kjo ndërhyrje e paparalajmëruar në shtëpinë time nuk ishte as e nevojshme dhe as e përshtatshme”, tha Trump në një deklaratë.
“Këto janë kohë të errëta për kombin tonë, pasi shtëpia ime e bukur, Mar-A-Lago në Palm Beach, Florida, është aktualisht nën rrethim, sulmuar dhe pushtuar nga një grup i madh agjentësh të FBI-së. Asgjë e tillë nuk i ka ndodhur kurrë një presidenti amerikan”.
Zëdhënësja e Departamentit të Drejtësisë, Dena Iverson nuk pranoi të komentojë mbi kërkimin, duke përfshirë nëse Prokurori i Përgjithshëm Merrick Garland e autorizoi personalisht kërkimin.
Departamenti i Drejtësisë po hetonte praninë e të dhënave të klasifikuara brenda 15 kutive të marra nga Mar-a-Lago nga Administrata Shtetërore e Arkivave dhe Regjistrimeve në fillim të këtij viti. Më pas, arkivi e përcolli rastin në Ministrinë e Drejtësisë.
Ligji federal ndalon heqjen e dokumenteve të klasifikuara në vende të paautorizuara, megjithëse është e mundur që Trump mund të përpiqet të argumentojë se, si president, ai ishte autoriteti përfundimtar i deklasifikimit.
Ka disa ligje që rregullojnë informacionin e klasifikuar, duke përfshirë një ligj që e bën vepër penale heqjen e të dhënave të tilla dhe mbajtjen e tyre në një vend të paautorizuar, i dënueshëm deri në pesë vjet burg. Një ligj tjetër e bën vepër penale keqpërdorimin e të dhënave të klasifikuara, qoftë me dashje ose nga pakujdesia e rëndë.
Asnjë veprim nëse s’do të kishte dyshime të arsyeshme
Hetimi nuk është e vetmja dhimbje koke ligjore me të cilën përballet Trump. Një hetim i veçantë lidhur me përpjekjet e Trump dhe aleatëve të tij për të përmbysur rezultatet e zgjedhjeve presidenciale të vitit 2020 dhe trazirat e 6 janarit 2021 në Kongres është intensifikuar gjithashtu në Uashington.
Prokurori i qarkut në Fulton County, Georgia, po heton nëse Trump dhe bashkëpunëtorët e tij të ngushtë donin të ndërhynin në zgjedhjet e shtetit, të cilat u fituan nga demokrati Joe Biden.
Një gjë është e sigurt – Departamenti i Drejtësisë dhe FBI nuk do ta kishin ndërmarrë këtë veprim nëse nuk do të kishin dyshime të arsyeshme se Trump kishte bërë diçka të gabuar.
Ai sigurisht që do ta shfrytëzojë të gjithë situatën për t’u paraqitur si hero dhe njeri i keqtrajtuar, të cilin do ta përdorë për zgjedhjet e ardhshme. Nëse ai nuk akuzohet në gjykatën federale.
Nëse del se ndërhyrja e FBI-së ka qenë e pajustifikuar, do të jetë një goditje e madhe për presidentin Biden dhe demokratët e tij përpara zgjedhjeve të Kongresit në nëntor të këtij viti. /tesheshi.com/
