Shkencëtarët në Ohio State University kanë arritur të krijojnë një tru njerëzor në kushte laboratorike, i cili është në kushtet e një fetusi 5-javor.
Organoidet e trurit, të cilat janë krijuar nga qelizat e trupit të një të rrituri, përbëjnë modelin më të mirë të krijuar deri më tani, ka bërë me dije Rene Anand, profesor i kimisë biologjike dhe farmakologjisë në Ohio State.
Është i vogël sa goma fshirëse e një lapsi dhe nuk ka vetëdije. Ai u krijua nga qelizat e marra nga lëkura e personave të rritur, të transformuara në qeliza embrionale për t’i riprogramuar.
Dhe ja ku u arrit, në modelin më të plotë të trurit njerëzor, të zhvilluar deri më tani. Për herë të parë, organi i prodhuar në laborator arrin të riprodhojë 99% të llojeve të ndryshme të qelizave dhe gjeneve që e përbëjnë, duke përfshirë një pjesë të palcës së kurrizit dhe retinës.
“Qelizat e trurit laboratorik janë identike me ato të gjeneve që përmban një tru normal”,- ka thënë Anand. Ai shton se ‘fuqia e këtij modeli laboratorik të trurit është se do të mund të zgjidhë probleme komplekse shëndetësore”.
Për të kaluar në hapin e mëtejshëm të rritjes së organit është e nevojshme një rrjet enësh gjaku, që mund të arrihet pa krijimin e një zemre artificiale. Ekipi i shkencëtarëve i Universitetit të Ohajos po ruan me shumë kujdes teknikën e përdorur.
Mungesa e qartësisë i bën shkencëtarët e tjerë të kenë dyshime, por nëse lajmi konfirmohet dhe miratohet nga komuniteti i shkencëtarëve, do të hapte një shteg krejtësisht të ri për studimin e funksionit të trurit dhe zhvillimin e medikamenteve të reja./tesheshi.com/
