Dje, për herë të parë në Shqipëri, është çarë një digë hidrocentali. Nuk është fjala për veprat hidroenergjitike të kohës së komunizmit, por për ato të para pak viteve, nën qeverisjen e Berishës, kur vërshuan lejet për HEC-e private, duke bërë që në shumë përrenj e lumenj të Shqipërisë të niste ndërtimi i tyre.
Kështu, në Bunec, diga e hidrocentralit të Sasajt u ça, duke bërë që uji të vërshonte poshtë për të përfunduar në det, duke sjellë dëme në disa banesa e biznese të zonës, por fatmirësisht pa pasoja në njerëz. Ndërkohë, rruga nacionale u bë e pakalueshme.
Kujtojmë se ky hidrocentral është kontestuar në kohën e ndërtimit nga Fatos Lubonja, në vitin 2010, i cili e pikasi atë si një vepër pa sens që kishte cënuar bregun e Jonit.
Fat është që lartësia ku gjendet diga dhe rrëpira poshtë saj, si dhe fakti se zona nuk ka shumë popullim, nuk ka sjellë pasoja të rënda. Por e rëndë në këtë rast është shembja e një dige, e cila në rrethana të tjera mund të kishtë bërë hatanë.
Një hetim ka nisur edhe nga prokuroria mbi shkaqet, teksa pritet që të merren në pyetje edhe përgjegjësit që realizuan projektin vite më parë. Dy janë pistat kryesore pse mund të jetë çarë diga: punimet pa cilësi dhe mbingarkesa me ujë mbi kapacitetin e saj si rrjedhojë e prurjeve të larta. /tesheshi.com/
