Hera e parë në publik: Engjëll Agaçi “edukon” znj. Tabaku

Për herë të parë është shfaqur në publik Engjëll Agaçi, Sekretari i Përgjithshëm i Kryeministrisë, zgjedhur nga Rama dhe ardhur nga Italia për ta kryer këtë detyrë që në 2013-ën.

Ndër emrat më të lakuar në akuzat e opozitës, Agaçi ka qenë një befësi etike për aktorët opozitarë në komisionin hetimor për inceneratorët.

Pa u futur aspak në terma politikë, qëndruar besnik aspektit burokratik të detyrës, si dhe me një qetësi dhe edukatë sipërore në komunikim, ai gati çarmatosi kampin prej ku janë thënë “1000 të zezat” mbi të, edhe mbi inceneratorët.

Prej mënyrës së komunikimit, ai diktoi dhe një tjetër stil e tonalitet te kryetarja Tabaku, e cila u shfaq e qetë dhe e përkorë përballë një të superakuzuari nga mazhoranca. Askush s’i kish thënë aq shumë “zonjë e nderuar” dhe jo ironikisht, sa z. Agaçi.

Agaçi iu përgjigj pikërisht akuzës së 17 vendimeve në një ditë, duke arsyetuar:

“Profesor Cani (ish-ministri i Financave)  bëri një ekspoze shumë të gjatë të situates: këto procedura kanë filluar nga mesi ose fundi i korrikut. Edhe nga dëshmia e prof. Canit, procedurat kanë filluar në muajin korrik e në momentin e finalizimit nuk do të do të thotë se kanë filluar e kanë mbaruar në nëntor.

Ai vendim është marrë në një mbledhje të zakonshme të KM-së, është fakt publik që çdo ditë të mërkurë KM zhvillon mbledhjen javore. Ka ndodhur edhe siç ka ndodhur edhe vitet e shkuara.

Ky është një precedent i përsëritur ndër vite”, tha Agaçi, përballë të cilit, kryetarja Jorida Tabaku nuk qenë ajo e cila është shfaqur para aktorëve të tjerë të mazhorancës në rastin e “marrjes në pyetje” për inceneratorët.

E njëjta gjë pothuajse ndodhi dhe një ditë më parë dhe me ish-ministrin Shkëlqim Cani, ku znj. Tabaku u detyrua t’i drejtohet me cilësorin respektues “Profesor”. /tesheshi.com/