Nuk ka qenë e vështirë të kuptohet se për kë e ka patur fjalën kreu demokrat Basha kur ka folur për një “bukëshkalë” në Lushnje e Divjakë.
Duke sulmuar partitë që dolën nga PD, që sipas Bashës kanë qenë krijesa të Ramës për të përçarë PD-në (Patozi, Topalli, Murrizi, Hajdari), Basha e çoi fjalën te njeriu që e ka gjuhën brisk, e që së fundi me këtë gjuhë shpotiti rëndë dhe Bashën, duke e quajtur ish-“kamarier paçe”.
“Katër vite me radhë, katër faktorë që e hiqnin veten sikur kishin dalë nga PD-ja megjithëse unë ua kam thënë ju e ua kam thënë shqiptarëve nga mediat se nuk ka parti që ka dalë nga PD-ja, ka krijesa që ka sponsorizuar Edi Rama disa prej tyre bukëshkalë që kanë shkelur mbi sakrificat e lushnjarëve dhe banorëve të Divjakës për interesat e tyre personale dhe me 25 prill e morën përgjigjen, në Divjakë, Lushnje dhe në të gjithë Shqipërinë dhe shkuan aty ku e kishin vendin”, tha Basha plot nervozitet.
Basha ka bërë një avokati të vetëvetes, duke u thënë përkrahasve: “Ju e dini që lidershipi im s’ju ka dhënë privilegje por vetëm sakrifica.
Dhe disa prej betejave më të mëdha të pluralizmit janë zhvilluar në këto vite, i kemi zhvilluar së bashku.
Por ka qenë pikërisht ndërthurja e sakrificave dhe betejave që kemi bërë së bashku, çelësi i faktit që sot pas një masakre zgjedhore të përmasave si ajo e 25 prillit, ne nuk jemi më të dobët por më të fortë.
Fakti që ka dëshmuar shqiptarëve se përmes këtyre sakrificave dhe betejave ne nuk jemi njerëzit e privilegjeve për veten tonë, por jemi njerëzit që i primë betejave për fatin e tyre dhe familjeve të tyre”. /tesheshi.com/
