Nga Blendi Gashi
Presidenti, Hashim Thaçi, përmes një video-mesazhi, në urimin për qytetarët për Vitin e Ri 2018, përveç deklarimeve të zakonshme ku flet për arritje, ka befasuar jo pak, pasi i është rikthyer premtimit që e ka bërë më së shumti si politikan, pra heqjes së vizave.
Si edhe në shtatë vitet e kaluara, Thaçi ka premtuar se 2018-ta do të jetë vit i liberalizimit të vizave.
“Vitin tjetër shënojmë 10 vjetorin e pavarësisë së Kosovës. Ky jubile duhet të shërbejë si motiv shtesë për të shënuar progres të mëtejmë. Kjo në masë të theksuar do të varet nga përkushtimi ynë për arritjen e një marrëveshjeje për normalizim të marrëdhënieve ndërshtetërore me Serbinë. Duhet që pa humbur kohë të ratifikojmë marrëveshjen ndërkufitare me Malin e Zi për t’i dhënë fund izolimit dhe për t’i hapur rrugë liberalizimit të vizave”, ka thënë Thaçi.
Por shtrohet pyetja: sa do ia qëllon Thaçi këtë herë kur kihet parasysh se për shtatë vjet rresht mashtroi qytetarët.
Dhe gjasat janë të mëdha që as më 2018-të të mos liberalizohen vizat edhe nëse Demarkacioni ratifikohet, pasi vendimi varet nga qëndrimi i të gjitha shteteve të Bashkimit Evropian.
Profesori i integrimeve evropiane, Avni Mazreku, ka thënë për tesheshi.com se versioni më optimist për heqjen e vizave është nëse shtetet votojnë sipas mënyrës së parë të votimit, të shumicës së kualifikuar që nënkupton 55 për qind e shteteve duhet të jenë pro, që i bie 16 shtete pro, të cilat duhet të përfaqësojnë 65 për qind të popullësisë të BE-së.
“Megjithatë edhe nëse ndodh ky skenar, katër shtete mund të bëhen bashkë dhe ta përdorin mekanizmin e minorancës bllokuese, që përfaqësojnë 35 për qind të popullësisë të BE-së. Në rastin e Kosovës janë pesë shtete që nuk e kanë njohur, që i bie se katër shtete mund të bëhen pro dhe ta përdorin këtë mekanizëm për raste bllokuese. Por, fatmirësisht të pesë shtetet që nuk na kanë njohur nuk i përbëjnë 35 për qind të popullësisë të BE-së.
Skenar tjetër negativ është që shtete që e kanë njohur Kosovën e që nuk e mbështesin politikën e dyerve të hapura të Bashkimit Evropain, sidomos dy shtetet më të mëdhaja të BE-së, Franca dhe Gjermania janë në procese elektorale dhe nuk ju konvenon të kenë një qëndrim pro sepse ata humbin elektoralisht në vendet e tyre”, thotë Mazreku.
Kujtojmë se Thaci premtimin e parë për heqjen e vizave e ka bërë gjatë një fushate elektorale në vitin 2010 ku premtoi se për 15 muaj do të hiqen vizat për kosovarët.
