Nga Albuena Jahaj
Siç është bërë e ditur tashmë, Kosovën e ka kapluar një tjetër e keqe shoqërore: heqja dorë nga shtetësia, pra nga të qënit zyrtarisht kosovar, për t’u konvertuar në tjetër shtetas, gjithherë perëndimor, por në vende që nuk pranojnë dyshtetësinë. Aktualisht, llogaritet se më shumë se 37 mijë kosovarë janë ç’kosovarizuar, që do të thotë pra se vendit i janë pakësuar banorët.
Kërkesën për heqje dorë nga nënshtetësia e Kosovës tashmë e ka dorëzuar edhe Aida Musolli bashkë më vajzën e saj. Ajo thotë se shteti gjerman i ka kërkuar që të heq dorë nga nënshtetësia kosovare nëse dëshiron që ta ketë atë gjermane. Për zonjën 41-vjeçare kjo nuk është aspak e lehtë por që nuk kanë zgjidhje tjetër. “Nuk më pëlqen, por nuk kemi zgjidhje tjetër. Kjo është çështje politike dhe si e tillë duhet të merret më shumë seriozitet, pasi që shumë qytetarë po kërkojnë që edhe më vetëdëshirë të heqin dorë nga nënshtetësia e shtetit të tyre”, ka thënë Musolli ndërsa pret që sapo të përfundojë procedurat të ketë të drejtën e nënshtetësisë gjermane.
“Këtu nuk të mbështesin për asgjël; nuk ka sigurime shëndetësore, nuk ka zhvillim ekonomik e as punësim, dhe normalisht që qytetarët lodhen dhe kërkojnë të heqin dorë nga nënshtetësia, edhe nëse nuk janë fare në mes të dy nënshtetësive, por më dëshirë nuk duan të jenë qytetarë të Republikës se Kosovës”, përfundon 41-vjeçarja jo pak e dëshpëruar me këtë që po ndodh.
Me trendin e deritanishëm, llogaritet që brenda 10 viteve të ardhshme Kosova të humbë afro 100 mijë banorë.
Këë e pranoi dhe Valdet Hoxha, zëvendësministër i Punëve të Brendshme, gjatë një prononcimi për tesheshi.com.
“Duke pas parasysh që shumica e shteteve te Bashkimit Evropian nuk lejojnë dyshtetësinë për shtetasit që nuk janë pjesë e Unionit, atëherë shtetasit e Kosovës që kanë vendbanimin të rregullt në këto shtete, në rast të plotësimit të kushteve për fitimin e shtetësisë së këtyre vendeve, janë të obliguar të heqin dorë nga shtetësia paraprake”. Sipas zëvendësministrit Hoxha, numri më i madh i kërkesave për heqje dorë nga nënshtetësia vjen Gjermania pasi që nuk e lejon dyshtetësinë.
Heqja dorë nga nënshtetësia e Kosovës nga shumë banorë të saj në aspektin sociologjik shihet si mungesë e një jetë më të mirë dhe më kushte jo të mira për jetesë. Sipas sociologut Ferdi Kamberi, emigrimi si fenomen shoqëror tek shqiptarët nuk është i ri. Ai daton qysh herët dhe është manifestuar përmes formave dhe llojeve të ndryshme, kryesisht si rezultat i rrethanave të krijuara politike në periudha të ndryshme dhe si rezultat i shkaqeve socio – ekonomike.
“Një gjë e tillë konsiderohet si e drejtë e individit dhe hyn në kuadër të të drejtave dhe lirive të njeriut. Andaj, shkaqet e këtij heqjes dorë prej shtetësisë së Kosovës janë të ndryshme, si: faktorët socio – ekonomik, papunësia e lartë e cila ka prodhuar varfëri të lartë, mungesa e perspektivës në shoqërinë kosovare, arsyet për një jetë më të mirë në vendet ku për punë të njëjta paguhet më mirë, arsyet individuale, arsyet/shkaqet për bashkim familjar, mungesa e një sigurimi shëndetësor, pastaj presioni nga shtetet tjera që nuk pranojnë dy – shtetësi i vë në një pozitë të palakueshme qytetarët e Kosovës që të zgjedhin në mes të Kosovës dhe shtetit në të cilin jetojnë”, ka thënë Kamberi.
Sipas tij, faktorë të tjerë janë edhe getoizimi i Kosovës dhe mos liberalizimi i vizave, si dhe nevoja për të vizituar shtetet tjera.
“Perceptimi i shumë qytetarëve të Kosovës është se pothuajse BE-ja i ka lënë në harresë kosovarët, andaj edhe me rastin e kontakteve të para në perëndim, ata mundohet që të shkëputen edhe me dokumente nga Kosova. Pra, shkaqet mund të jenë të ndryshme, megjithëse edhe një pjesë e shteteve tjera nuk pranojnë dy shtetësinë”, ka thënë për tesheshi.com sociologu Ferdi Kamberi i cili tha se pasojat nga heqja dorë e shtetësisë mund të jenë të ndryshme, ku veçihet ajo e asimilimit të qytetarëve të Kosovës në vendet tjera. /tesheshi.com/
