Roman Abramovich dhe dy negociatorë ukrainas po shfaqin simptoma të helmimit pas një takimi në Kiev këtë muaj, raportoi Wall Street Journal.
Sipas tyre, Abramovich dyshohet se është helmuar pas një takimi në të cilin ka ndërmjetësuar mes palëve ndërluftuese.
Wall Street Journal shkruan se ai udhëtoi mes Moskës, Lvivit dhe vendeve të tjera ku u zhvilluan negociatat, ku ishin të pranishëm edhe dy zyrtarë të lartë nga Ukraina.
Theksohet se të gjithë kanë shfaqur simptoma të ngjashme – skuqje në sy, sy që lotojnë vazhdimisht, njolla në fytyrë dhe duar që po u zhvishet lëkura…
Nga ana tjetër, sipas Shaun Walker, korrespondent i The Guardian në Evropën Qendrore dhe Lindore, një burim i mirëinformuar deklaroi se “Roman (duke iu referuar Roman Abramovich) humbi shikimin për disa orë” dhe u shtrua në spital në Turqi.
Raportohet se mëngjesin e së mërkurës së kaluar, një aeroplan privat Hawker 800XP u ngrit nga aeroporti Ataturk në Stamboll, duke fluturuar në lindje përmes Detit të Zi dhe duke hyrë në hapësirën ajrore ruse mbi Soçi. Menjëherë pas kësaj, ai fiku pajisjen e tij të radarit të monitorimit të fluturimit pranë banjës ruse Mineralnye Vody.
Atë mbrëmje, i njëjti aeroplan u ngrit nga aeroporti Vnukovo në Moskë dhe u kthye në Stamboll. Në aeroplan ishte Roman Abramovich, një miliarder rus dhe ish-pronar i Chelsea FC, i cili në bisedimet me Ukrainën shërbeu si delegat jozyrtar i presidentit rus Vladimir Putin.
Abramovich u takua me Putinin në Moskë dhe i solli atij një shënim të shkruar me dorë nga presidenti ukrainas Volodymyr Zelensky që përshkruante kushtet e Ukrainës për t’i dhënë fund luftës. /tesheshi.com/
