Nuk është helmim hidrik ai i Deçanit, ku qindra persona kanë përfunduar në spital.
Analizat mikrobiologjike të mostrave të ujit kanë rezultuar negative.
Kjo u konfirmua nga Adnora Nurboja në IKSHPK, e cila theksoi se uji në Deçan nuk është i infektuar.
Megjithatë, ajo shtoi se pavarësisht rezultateve, në vijim do të merren sërish mostra për testim.
Edhe drejtori i Institutit Kombëtar të Shëndetësisë Publike, Naser Ramadani është shprehur më herët se helmimet nuk kanë ndodhur për shkak të ujit.
Ai theksoi se kjo nuk do të thotë se infeksioni nuk është nga uji por se analiza të tjera do të vazhdojnë të bëhen për të gjetur shkakun.
“Rezultatet laboratorike që kanë dalë sot flasin për momentin se nuk kemi asnjë pistë të helmimit hidrik. Por, kjo nuk do të thotë se nuk ka infeksione hidrike. Por, kjo do të dal pas analizave permanente si të ujit ashtu edhe të analizave të pacientëve. Do të informohemi me kohë”, tha Ramadani.
Situata e pazakontë në Deçan ka bërë që dje të shpallej “gjendje e jashtëzakonshme” si pasojë e helmimit të mbi 1 mijë e 500 qytetarëve. /tesheshi.com/
