Një laborator kërkimor në Mbretërinë e Bashkuar mund të jetë burimi I agjentit nervor të përdorur në sulmin ndaj ish-spiunit rus, Sergei Skripal dhe vajzës së tij. Të paktën kështu ka lënë të kuptohet ambasadori rus në BE, Vladimir Chizhov në një intervistë për BBC-në. Ai tha se Rusia nuk e zotëronte këtë helm dhe se laboratori Porton Down ishte vetëm tetë milje nga qyteti ku ndodhi ngjarja.
Por, qeveria e Londrës ka hedhur poshtë komentet e tij të cilësuara si të pakuptimta.
Komentet e diplomatit rus vijnë pasi një zëdhënëse e ministrisë së Jashtme ruse tha se Britania e Madhe ishte një nga burimet më të mundshme të agjentit nervor, së bashku me Republikën Çeke, Sllovakinë, Suedinë ose ndoshta Shtetet e Bashkuara. Më parë, Organizata për Ndalimin e Armëve Kimike tha se asnjë nga shtetet e saj anëtare nuk ka deklaruar posedimin e grupit Novichok të agjentëve nervorë.
Agjenti i dyfishtë i Rusisë dhe Mbretërisë së Bashkuar, Sergei Skripal dhe vajza e tij, Julia u helmuan më 4 mars. Kryeministrja britanike Theresa May ka akuzuar Rusinë si përgjegjëse për këtë ngjarje dhe situata mes dy vendeve është përshkallëzuar në konflikt diplomatik. /tesheshi.com/
