Presidenti i Shteteve të Bashkuara, Donald Trump mund të jetë në prag të marrjes së vendimit për të dëbuar të paktën 20 diplomatë rusë, në kundërpërgjigje ndaj helmimit të ish-spiunit rus në Britani, Sergei Skripal. Kështu bëjnë të ditur mediat që thonë se mendimi mund të merret më 26 mars.
CNN dhe Reuters thanë se me gjasa, vendimi mund të varet nga lëvizjet e aleatëve evropianë, në përgjigje ndaj sulmit me agjent nervor në qytetin Salisbury të Britanisë. Ish-spiuni rus, Sergei Skripal dhe vajza e tij Yulia, u gjetën pa ndjenja më 4 mars dhe vazhdojnë të jenë në gjendje kritike për jetën.
Zyrtarët britanikë thonë se “ka gjasa të mëdha” që Moska qëndron pas këtij sulmi, qëndrim të cilin e ka shprehur edhe Bashkimi Evropian.
Londra ka dëbuar 23 diplomatë rusë në përgjigje të helmimit. Moska ka mohuar çdo përfshirje dhe është kundërpërgjigjur duke dëbuar 23 diplomatë britanikë nga Rusia.
Zëdhënësi i Shtëpisë së Bardhë, Raj Shah ka thënë se Uashingtoni po e konsideron mundësinë e dëbimit të diplomatëve, por nuk ka dhënë më shumë detaje. /tesheshi.com/
