Hekurudha Tiranë-Prishtinë i jep mundësinë Kosovës që të dalë në Detin Mesdhe, shpjegoi ministra Balluku, pak pasi ky projekt u firmos në mbledhjen e dy qeverive në Prishtinë.
Siç tha ajo për Euronews Albania, ndërtimi i hekurudhës Tiranë-Prishtinë do të krijojë mundësinë që të gjithë aksesin që Shqipëria ka në Detin Mesdhe, t’ia japi dhe Kosovës.
“Është një projekt që jo vetëm do të lidhë dy vendet me hekurudhë, por edhe përmes konceptit të dy porteve, portit të Durrësit dhe portit të thatë të Prishtinës. Është një koncept shumë modern që është zbatuar në vende shumë të zhvilluara sa i përket tregtisë”, tha znj. Balluku.
Gruaja që po udhëheq disa vepra të rëndësishme infrastrukturore vitet e fundit në Shqipëri, tha se mbetet për t’u hapur gara për të pasur një kompani fituese për realizimin e projektit. Sipas saj, parashikohet që hekurudha të mund përfundojë brenda një harku kohor prej 4 vitesh. /tesheshi.com/
