Kryeministri Edi Rama ka tentuar të mbyllë me një status facebook-u zhurrmnajën më të fundit të përhapur edhe ne media sociale, atë mbi ndërtimin e dy HEC-ve mbi Osum, pikërisht te kanionet e famshme.
“Qysh se u krye procedura ligjore e miratimit të një lejeje të dhënë nga qeveria e mëparshme dhe u mor sinjali se diçka nuk shkonte, Ministri i Mjedisit Blendi Klosi nisi hetimin administrativ të lejes mjedisore. E cila rezultoi një fabrikim kriminal me koordinata të manipuluara. Individët e përfshirë në këtë fabrikim do të kallëzohen në prokurori, ndërsa e gjithë procedura do të anulohet.
Falenderoj qytetarët që na e çuan të parët këtë sinjal përmes Platformës së Bashkëqeverisjes shqiperiaqeduam.al dhe të gjithë të tjerët që u përfshinë në publikimin e këtij krimi të mbetur në tentativë.
Asnjë qeveri askund në botë nuk është e pagabueshme, por qeveritë dallojnë nga mënyra sesi reagojnë, qoftë kur gabojnë apo qoftë si në këtë rast, kur pa dashje mund të jenë duke gabuar.
Ndjesë kujtdo që me të drejtë u shqetësua apo pikëllua nga lajmi i keq i prekjes së Kanioneve Magjike dhe mezi pres të rikthehem atje, në duart e djemve e vajzave të mrekullueshme të Federatës Shqiptare të Raftingut”, shprehet Rama.
Bën përshtypje në këtë rast fraza “Individët e përfshirë në këtë fabrikim do të kallëzohen në prokurori”.
Por kush janë këta të fundit? Lajmi i HEC-ve mbi Osum u dha fillimisht nga Top Channel, linja editoriale e të cilit ka marrë një kahje anti-pushtet kohët e fundit. /tesheshi.com/
