Rreth 1000 etiopianë izraelitë dolën mbrëmjen e së enjtes në rrugët e Jerusalemit duke protestuar kundër racizmit dhe brutalitetit policor. Manifestimi i tyre u kthye në përplasje me policinë, gjatë së cilës u lënduan 15 persona, përfshirë tre punonjës të forcave të rendit.
Protesta mori shkas nga një video e qarkulluar që prej së hënës, ku shfaqeshin dy policë izraelitë duke dhunuar dhe arrestuar një rekrut me origjinë etiopiane.
Protestuesit u përpoqën t’i afrohen banesës së kryeministrit, por u ndaluan nga policia, e cila përdori kundër tyre gas lotsjellës dhe granata trullosëse.
“Bashkësia etiopiane në Izrael është diskriminuar ngahera. Ajo e ka ndjerë gjithmonë racizmin në Izrael midis të bardhëve dhe të zinjve,” u shpreh i revoltuar një protestues.
Të indinjuarit mbanin në duar pankarta ku shkruhej, “Mjaft dhunës policore”, “Gestapo”, e thërrisnin, “Policët janë një turp”.
I menjëhershëm qe reagimi i kryeministrit izraelit, Benjamin Netanyahu, me një deklaratë ku bënte thirrje për qetësi. Ai e dënoi dhunën e ushtruar mbi rekrutin me origjinë etiopiane, dhe premtoi se qeveria e tij do të ndërmerrte hapa për ta lehtësuar integrimin e hebrenjve etiopianë në shoqërinë izraelite.
Rreth 120.000 është numri i hebrenjve etiopianë në Izrael, të cilët e kanë patur të vështirë të integrohen në shoqërinë izraelite dhe kanë qenë shpesh pre e dhunës policore. Ata janë ankuar pareshtur për diskriminim në arsimim dhe në strehim.
Hebrenjtë etiopianë filluan të mërgojnë për në Izrael mbasi rabinët e mëdhenj vendosën në vitin 1973 se bashkësia kishte rrënjë biblike. Dy prej valëve më të mëdha të emigrimit kanë qenë në vitet 1984 dhe 1991. /tesheshi.com/
