Një pjesë e të rinjve hebrenj në Izrael refuzon të bëjë shërbimin ushtarak në kontekstin e luftës së fundit ndaj Hamasit. Ata gjithashtu kundërshtojnë pushtimin e territoreve palestineze, bombardimin e Gaza-s dhe vrasjen e civilëve.
Sipas rregulloreve izraelite, periudha e shërbimit të detyrueshëm ushtarak është 32 muaj për burrat mbi moshën 18 vjeç dhe 24 muaj për gratë. Kushdo që refuzon mund të përballet me 200 ditë burg, si dhe presion social.
Pavarësisht kësaj, një pjesë e të rinjve hebrenj refuzojnë shërbimin ushtarak, madje me çmimin e një dënimi me burg, siç thonë ata. Si argument për këtë ata deklarojnë se ushtria izraelite i persekuton palestinezët dhe u bën padrejtësi.
Në një deklaratë për Anadolu Agency, një i ri, Tal Mitnick,18 vjeç, i cili jeton në zonën Bat Yam në jug të Tel Avivit, tha se ushtria izraelite po shtyp palestinezët. Ai thotë se sapo ka mbaruar shkollën e mesme dhe nuk pranon të shkojë në ushtri.
Sipas tij, ushtria izraelite është krahu operacional i elitës hebreje në këtë rajon dhe bazohet në shtypjen e popullit palestinez. Mitnick refuzon të jetë pjesë e asaj shtypjeje. Ai thekson se njerëzit që mendojnë si ai janë pakicë në Izrael, duke thënë se situata ka filluar të ndryshojë dalëngadalë.
Refuzimi i rekrutimit
Pikëpamje të ngjashme ndan edhe Ariel Davidov, 19 vjeç, i cili jeton në një vendbanim pranë Jeruzalemit të pushtuar. Ai thotë se që në moshë të vogël ka qenë në kontakt me grupet për mbrojtjen e të drejtave të njeriut. Davidov, i cili dëshmoi se forcat izraelite përdornin dhunë të tepruar kundër palestinezëve në lagjet e Jeruzalemit Lindor si Sheikh Jarrah, Silwan dhe Isawiya, vëren se ai mori pjesë në protesta kundër përpjekjeve për të judaizuar Qytetin e Shenjtë.
Ai thotë se arsyeja që refuzon të kryejë shërbimin ushtarak në ushtrinë izraelite është se nuk dëshiron të jetë “pjesë e padrejtësisë dhe amoralitetit”, siç tha ai. Ai shton se gjenocidi ka vazhduar që nga fillimi i Sionizmit. Nuk filloi në vitin 1948 (viti kur u themelua Izraeli) ose 1967 (viti kur Jerusalemi Lindor, Bregu Perëndimor dhe Gaza u pushtuan). Para kësaj kishte kolonializëm kolonësh. Ata donin të përdornin Palestinën dhe popullin e saj për interesat e tyre. Megjithatë, kjo situatë nuk mund të zgjasë përgjithmonë, tha ai.
“Shumë nga miqtë e mi të ngushtë refuzuan shërbimin ushtarak. Që kur kam filluar të punoj për të drejtat e njeriut, grupi ku bëj pjesë i ka bërë thirrje të gjithëve të refuzojnë shërbimin ushtarak. Kjo është pjesa kryesore e betejës sime. Shumë nga miqtë e mi shkuan në burg sepse nuk pranuan të bënin shërbimin ushtarak”, shtoi ai.
Lidhur me sulmin e Hamasit të 7 tetorit, Davidov tha: “Sulmi i Hamasit më goditi thellë, por nuk mendoj se erdhi nga hiçi (pa arsye). Unë besoj se pushtimi dhe bllokada ndaj Gaza-s është arsyeja kryesore për këtë”.
“Çdokush ka të drejtë të jetojë i lirë”
Hebreja e re Ella Kedar gjithashtu refuzoi të shërbente në ushtri. Ajo shprehu besimin e saj se secili ka të drejtë të jetojë i lirë.
“Unë nuk dua të shërbej në një ushtri që zbaton një okupim dhe një regjim racist. Unë nuk dua të marr pjesë në shtypjen e popullit palestinez në këtë projekt shfrytëzues të kryer nga okupimi”.
Në kontekstin e agresionit izraelit ndaj Gaza-s, liderët e hebrenjve fetarë (Haredi) kanë theksuar sërish kundërshtimin e tyre për rekrutimin në ushtrinë izraelite. Pjesëmarrja e Haredit në ushtri është një nga çështjet më të ndjeshme dhe më të tensionuara në shoqërinë izraelite.
Sekularistët në shoqërinë izraelite nuk pajtohen me hebrenjtë fetarë që shmangin rekrutim, sepse, thonë ata, përfitojnë më shumë nga ajo që i ofrojnë Izraelit. /tesheshi.com/
