Shprehet i pakënaqur me rezultatin e partisë së tij në zgjedhjet e 11 qershorit.
Thotë se LDK-së i duhen reforma të thella por nuk preferon të flasë me emër se kush duhet ta merr timonin e partisë pas Mustafës.
Është ky Haxhi Avdyli, kryetar i degës së LDK-së në Prizren i cili për herë do të ulet në Kuvend. Ai pret që legjislatura e re të merret me problemet e qytetarëve dhe jo me popullizma si vitet e kaluara.
Avdyli, në intervistën e dhënë për tesheshi.com tregon poashtu se ç’mund të ngjajë nëse presidenti nuk ja jep mandatin një partie/koalicioni tjetër nëse dështon PAN-i, ndërsa flet edhe për zgjedhjet lokale të 22 tetorit.
Intervistoi: Blendi Gashi
Sa jeni e kënaqur me rezultatet e partisë tuaj që e nxjerrin të tretën në zgjedhjet e 11 qershorit? A është diç që e keni pritur apo jeni befasuar?
Si parti s’jemi të kënaqur me këtë rezultat. Çdo rezultat ku LDK s’është e para s’duhet të na jep vetëkënaqësi sepse LDK ka kuadrot dhe orientimin politik më të mirin. Përkundër një lufte speciale të gjitha akterve politikë në Kosovë, kemi ruajtur numrin më të madh të votuesve.
Pse mendoni se elektorati ia kthej shpinën LDK-së? A është një nga arsyet koalicioni i kaluar me PDK-në për çka ju ishit kundër? Po diç tjetër çka nuk shkojë në rregull?
Koalicioni me PDK-në dhe mënyra e lidhjes së këtij koalicioni ka dëmtuar thellësisht besimin e një numri të konsideruar të votuesve të partisë sonë. Ka edhe faktorë tjerë që duhet studiuar pse nuk kemi besimin e duhur si LDK.
Janë zgjedhjet e katërta në krye me Mustafën që LDK-ja po i humbet. A duhet përfundimisht të largohet nga drejtimi i partisë dhe të fillon një reformim i thellë në të gjitha strukturat? A pritni të ndodhë kjo sivjet?
Reflektimi dhe reformimi brenda partiak është nevojë e çdo partie. Ky rezultat shton nevojën e saj. Prandaj pas qetësimit të vorbullës elektorale lokale dhe zgjedhjes së institucioneve qendrore duhet t’i shtojmë diskutimet brenda partiake për reformimin e duhur të LDK-së.
Vjosa Osmani edhe pse u rendit në vendin e 81-të doli si e dyta më e votuara ë parti. Sipas jush a duhet ajo të merr drejtimin e partisë?
Janë delegatët që vendosin në Kuvendin e partisë. Por ajo çka s’duhet lejuar më është bllokimi i kandidaturave. Ajo është antidemokratike dhe e dëmshme për raportet në parti.
Ju për herë të parë keni fituar mandatin e deputetit. Ç’pritni nga legjislatura e re parlamentare?
Legjislatura re duhet të merret me çështjet vitale të popullatës. Duhet lënë anash popullizmat dhe protagonizmat, por duhet t’i qasemi problemeve jetësore të popullatës siç janë, ekonomia, arsimi, shëndetësia, krijimi i ushtrisë, liberalizimi e shumë çështje tjera.
Stabiliteti në Kuvend do të thotë edhe stabilet i shoqërisë kosovare.
Rezultatet e zgjedhjeve asnjërës parti nuk i sigurojnë formimin e qeverisë. Nëse koalicioni fitues këtë rast PAN dështon të formojë qeverinë, a duhet t’ia japë presidenti mandatarin partisë/koalicionin të dytë? Nëse nuk vepron kështu a mund të ketë destabilitet?
Nëse PAN nuk arrinë të krijon qeverinë atëherë domosdoshmërisht duhet një shumicë që vërteton numrin mbi 61 deputet dhe asaj duhet dhënë mandatin. Tjera ide janë të rrezikshme për stabilitetin dhe krijojnë tensione të panevojshme. Shpresojmë që presidenti nuk rrezikon stabilitetin e vendit duke marrë anë në këtë situatë nga ata që s’munden të fitojn numrat e nevojshëm të deputetëve për krijimin e qeverisë.
Kosova dhe stabiliteti institucional do duhej të jetë mbi interesat klanore e grupore të secilit politikan e veçanërisht kur bëhet fjalë për presidentin.
Për fund, zgjedhjet lokale do mbahen më 22 tetor. A do jeni kandidat i LDK-së për Prizrenin?
Për Prizrenin si degë jemi përcaktuar të garojmë me ish deputetin Hatim Baxhakun i cili gëzon një autoritet të mirë në qytet edhe si profesionist dhe si politikan parimor. Fitorja me Hatimin është e padiskutueshme, kurse unë do të japë kontributin si deputet. /tesheshi.com/
