I ndjeri Mirush Kabashi, edhe pse “Nderi i Kombit”, nuk ishte “Qytetar Nderi” i Durrësit, qytetit të tij. Këtë titull e morri së fundi, muaj pasi u nda nga jeta, gjë që nuk u ka lënë një shije të mirë familjarëve të aktorit të madh.
“Është, është i vonuar, pse të gënjej? Do kisha dashur shumë që ta kishte marrë kur ishte gjallë”, tha e bija Mendi Kabashi.
Të njëjtën kritike pati dhe kolegia e tij e skenës, Aishe Stari.
“Për mua Mirushi ka qenë Qytetar Nderi i Durrësit. Përderisa është ‘Nder i Kombit’, ‘Qytetar Nderi’ është shumë pak në krahasim me atë. E them për të gjithë ata që i kanë në dorë këto gjëra, që gjërat të jepen në kohë. T’i gëzojnë ata që i meritojnë. Kënaqësinë e këtij titulli ta merrte Mirushi, jo të mbetet si një relike në shtëpi”, tha aktorja e njohur durrsake.
Mirush Kabashi u nda nga jeta më 5 dhjetor të vitit që lamë pas në moshën 75-vjeçare. Ai la pas një karrierë të gjatë e brilante, me rreth 100 role në teatër dhe filma, duke qenë ndoshta aktori më karakterial në artin shqiptar të aktrimit. /tesheshi.com/
