Duket se gjigandi i rrjeteve sociale po e humbet gjithnjë e më shumë besueshmërinë nga përdoruesit e tij. Teksa kjo platformë po orvatet të menaxhojë skandalin e shpërthyer së fundmi mbi të dhënat, atë po e braktisin gjithnjë e më shumë përdorues.
Sipas një vëzhgimi të fundit të Techpinions, në qendër të të cilit ishin rreth 1000 përdorues, rezulton se 9% e tyre e kanë fshirë tashmë llogarinë në Facebook për shkak të privatësisë. Ndërkohë, 17% përdorues janë shprehur se e kanë fshirë aplikacionin e Facebook-ut nga telefoni i tyre dhe 11% të tjerë thonë se e kanë fshirë atë nga pajisjet e tjera elektronike.
Sipas pronarit të Facebook, Mark Zuckerberg, hashtag-u #deletefacebook nuk ka pasur ndonjë impakt të ndjeshëm në pakësimin e përdoruesve të këtij rrjeti. Mirëpo, ekspertja e Techpinions, Carolina Milanesi, duke folur mbi vëzhgimin e bërë prej kësaj kompanie, thotë: “Këto shifra mund të mos e shqetësojnë vërtet rrjetin Facebook, por unë mendoj se u duhet dhënë rëndësi veprimeve që po ndërmarrin përdoruesit. Ato do të ndikojnë në mënyrë të drejtpërdrejtë në modelin e biznesit që ofron ky rrjet.”
Vëzhgimi i kryer nga Techpinions tregon se besueshmëria e përdoruesve ndaj Facebook-ut është zbehur, ndërsa 28% e tyre janë shprehur se nuk i kanë besuar kësaj platforme që në krye të herës. /tesheshi.com/
