Presidenti kosovar Hashim Thaçi është shprehur me tone të ashpra ndaj BE-së, pikqërisht për qasjen e saj ndaj Kosovës, duke i ngjarë në narrativën e tij kritike ndaj Europës, kryeministrit Rama.
Duke folur në një intervistë për DW, Thaçi shkoi deri aty sa të shprehet mosbesues ndaj kushtit të vënë nga Brukseli, se do t’i liberalizonte vizat sapo të kalonte Demarkacioni
“Edhe nëse do të ratifikojmë Demarkacionin në Kuvend, sërish do të kemi sfida me këtë përbërje të Komisionit Europian, sepse nuk e ka fokusin tek Kosova”.
“Është vendosur pa të drejtë dhe në mënyrë të befasishme nga Komisioni Europian dhe më shumë sesa kriter, ka qenë kurth politik i KE për Kosovën në mënyrë që të shtyjë edhe më tutje liberalizimin e vizave”, deklaron Thaçi me gjuhë të hidhur dhe denoncuese.
Sipas tij, ka një diskriminim të hapur e të qartë të Brukselit, karshi qytetarëve kosovarë.
“Aktualisht BE ka një qasje diskriminuese në raport me qytetarët e Kosovës, ndaj kemi kërkuar që kjo qasje të ndryshojë. Qëndrimi i BE është një pozicion absurd dhe i turpshëm në raport me qytetarët e Kosovës dhe institucionet e Kosovës. Ne kërkojmë të trajtohemi në mënyrë të barabartë me vendet e tjera të rajonit dhe jo të dublifikohen kriteret”, tha kreu i shtetit kosovar.
Kjo është e disata herë që Hashim Thaçi tregohet i ashpër me politikën europiane karshi Kosovës. /tesheshi.com/
