Presidenti i Kosovës Hashim Thaçi, deklaron në një shkrim autorial të botuar në portalin që financohet nga Komisioni Europian, EuroActiv se shteti që ai drejton nuk është vend musliman dhe se është i pari shtet në Ballkan që ka futur komunitetin e LGBT-së në Kushtetutë.
Hashim Thaçi, në shkrimin e tij shpreh kënaqësinë që në Austri nuk ka fituar kandidati i së djathtës ekstreme, i cili ka folur hapur kundër Kosovës.
Po ashtu, Thaçi ka folur edhe për betejën që po bëhet kundër mbështetësve të ISIS-it në Kosovë.
Ndërkohë, sipas Thaçit, kosovarët duhet të jenë “më katolik se Papa” në rrugën europiane.
Hashim Thaçi është i pari që pranon se është i lehtësuar nga rezultatet e zgjedhjeve presidenciale në Austri, kështu e parafrazon artikullin e shkruar nga presidenti Thaçi EurActiv.com
Ndërkohë, Thaçi në shkrimin e tij ka trajtuar edhe çështjen e pjesëmarrjes së kosovarëve në ISIS duke thënë se Kosova nuk është strehë e sigurt për ekstremistët. Ne shkrimin e tij, Thaçi ka thënë se Kosova nuk është muslimane por nje shoqëri qytetare shekullare.
“Kosova nuk është muslimane, shoqëria jonë është shekullare dhe civile. Kosova u bë vendi i parë në Ballkan që zgjodhi një grua Presidente në vitin 2011 dhe është i vetmi vend ballkanik që ka njohur të drejtat e LGBT-së me Kushtetutë. Unë i priva paradës së LGBT-së në Kosovë muajin e shkuar për të demonstruar mbështetjen për këtë komunitet dhe për t’i treguar në mënyrë precise qytetarëve tanë dhe gjithë botës se ekstremizmi dhe paragjykimi nuk kanë vend në shoqërinë tonë. Ne as nuk jemi një strehë e sigurt për ekstremistët. Shërbimet tona të sigurisë kanë bërë 110 arrestime dhe kanë siguruar 67 aktakuza dhe 26 dënime kundër mbështetësve të ISIS-it në vendin tonë. Sekretari i Shtetit amerikan, John Kerry, theksoi në vizitën e tij të fundit në Kosovë se kosovarët janë liderë regjional në luftën kundër ekstremizmit të dhunshëm. Sekretari i Përgjithshëm i Kombeve të Bashkuara, Ban Ki-moon gjithashtu njohu rolin aktiv të Kosovës për promovimin e dialogut ndërfetar në raportin e vitit 2013. Bashkimi Europian gjithashtu mori parasysh ritmin e përshpejtuar të bërjes së reformave dhe na dhuroi neve traktatin e parë të para pranimit në Be, marrëveshjen e Stabilizim – Asociimit,” ka shkruar Thaci për EurActiv.
Kreu i shtetit të Kosovës, më tej në shkrimin e tij, ka përmendur edhe skepticizmin europian karshi Kosovës dhe Ballkanit. Ai ka cituar edhe thënie për ta ilustruar betejën e vështirë drejt anëtarësimit në BE.
Për Thacin, Kosova dhe Ballkani po përdoren edhe si “kokë turku”. Por dëshmimi i ëndrrës dhe rrugës evropianë do të vazhdojë, pohon ai.
“Liberalizimi i vizave është fituar me vështirësi pas kryerjes së reformave të vështira të brendshme, por është e qartë që disa politikanë në Evropë janë duke ndërhyrë në disponimin aktual që është i karakterizuar nga pakënaqësia publike rreth migrimit dhe po e përdorin Kosovën dhe Ballkanin si një ‘kokë turku’. Siç e kemi festuar një fitore të ngushtë të forcave progresiste të Austrisë, një gjë është e sigurt: liderët e Ballkanit duhet të punojnë shumë për në forcimin e sundimit të ligjit dhe luftimit të emigracionit ilegal dhe ekstremizmit të dhunshëm për të dhënë një ndjenjë në rritje të sigurisë dhe për t’i siguruar skeptikët përqark Evropës. Ne duhet të jemi – siç është edhe thënia ‘më katolik se Papa’ – në mënyrë që t’i bindim mohuesit dhe skeptikët që ëndrra evropiane, rruga evropiane, është shansi jonë e vetme, kontrata më e mirë që mund ta nënshkruajmë për ta siguruar të ardhmen tonë”, ka shkruar Thaçi për EurActiv.
Përgatiti: Ylli Pata – /tesheshi.com/
